Civil Defence കുവൈത്ത് സിറ്റി: ഐഫോണുകളിൽ നാഷണൽ എമർജൻസി അലർട്ട്‌സ് സർവീസ് പ്രവർത്തിക്കാൻ ഉപകരണങ്ങൾ ഏറ്റവും പുതിയ iOS 26.4 പതിപ്പിലേക്ക് അപ്ഡേറ്റ് ചെയ്യണമെന്ന അറിയിപ്പ് നൽകി കുവൈത്ത്. ആഭ്യന്തര മന്ത്രാലയത്തിന്റെ കീഴിലുള്ള സിവിൽ ഡിഫൻസ് ആണ് ഇക്കാര്യം അറിയിച്ചത്.

അപ്ഡേറ്റ് ചെയ്താൽ മാത്രമേ അടിയന്തര മുന്നറിയിപ്പുകൾ തൽക്ഷണം ഫോണുകളിൽ ലഭിക്കൂവെന്ന് സിവിൽ ഡിഫൻസിലെ അലാറം സിസ്റ്റംസ് വിഭാഗം മേധാവി ലെഫ്റ്റനന്റ് കേണൽ യൂസഫ് അൽ-ഒതൈബി മാധ്യമ ബ്രിഫിംഗിൽ പറഞ്ഞു. നാഷണൽ എമർജൻസി അലർട്ട് സിസ്റ്റത്തിന്റെ ആദ്യ ലൈവ് പരീക്ഷണം വ്യാഴാഴ്ച എല്ലാ ഫോണുകളിലും ആരംഭിച്ചു. ആൻഡ്രോയിഡ്, ഹുവാവേയ്, ഐഫോൺ ഉപകരണങ്ങളിലേക്കും അലർട്ടുകൾ വിജയകരമായി അയച്ചതായി അധികൃതർ അറിയിച്ചു. അലർട്ട് ലഭിക്കുന്നതിന് Settings ? Notifications ? KWT Alert എന്ന ഭാഗത്ത് പോയി ഓപ്ഷനുകൾ പരിശോധിക്കണമെന്ന് അധികൃതർ നിർദേശിച്ചു. ഇതിൽ National Warning Alerts എന്ന ഓപ്ഷൻ സ്വയം സജീവമാകുന്നതും ഉയർന്ന അപകടസാധ്യതയുള്ള അടിയന്തര സാഹചര്യങ്ങളിൽ എല്ലാവർക്കും മുന്നറിയിപ്പ് ലഭിക്കുന്നതിന് ഇത് നിർബന്ധമാണെന്നും അദ്ദേഹം വ്യക്തമാക്കി. സിസ്റ്റം പൂർണമായി പ്രവർത്തനക്ഷമമാണെന്ന് ഉറപ്പാക്കുന്നതിനായി ഇപ്പോൾ പരീക്ഷണ ഘട്ടത്തിൽ തുടർച്ചയായ പരിശോധനകളും സാങ്കേതിക മെച്ചപ്പെടുത്തലുകളും നടത്തുകയാണെന്നും അധികൃതർ കൂട്ടിച്ചേർത്തു.

കുവൈത്തിലെ പുതിയ ജോലി അവസരങ്ങൾക്കായി ഇവിടെ ക്ലിക്ക് ചെയ്യാം

Drone Attack ശക്തമായ പ്രതിരോധം; കുവൈത്ത് വ്യോമപരിധിയിൽ 9 ഡ്രോണുകൾ വെടിവെച്ച് തകർത്തു

Drone Attack കുവൈത്ത് സിറ്റി: കഴിഞ്ഞ 24 മണിക്കൂറിനിടെ കുവൈത്തിന്റെ വ്യോമപരിധിയിൽ കണ്ടെത്തിയ 9 ശത്രു ഡ്രോണുകൾ പ്രത്യേക സേന വെടിവെച്ച് തകർത്തു. കുവൈത്ത് ആഭ്യന്തര മന്ത്രാലയമാണ് ഇക്കാര്യം അറിയിച്ചത്. രാജ്യത്തിന്റെ സുരക്ഷ ഉറപ്പാക്കാൻ നടത്തിയ കൃത്യമായും വേഗത്തിലുള്ളതുമായ നടപടികളാണ് ഇതെന്ന് മന്ത്രാലയം വ്യക്തമാക്കി. പ്രത്യേക സേനയുടെ ഈ നടപടി വ്യോമ പ്രതിരോധ സേനയുടെ പ്രവർത്തനങ്ങൾക്ക് പിന്തുണയായും ഉയർന്ന ജാഗ്രതയും തയ്യാറെടുപ്പും പ്രകടമാക്കുന്നതുമാണെന്ന് ആഭ്യന്തര മന്ത്രാലയത്തിന്റെ വക്താവും സുരക്ഷാ ബന്ധങ്ങളും മീഡിയ വിഭാഗത്തിന്റെ ഡയറക്ടർ ജനറലുമായ ബ്രിഗേഡിയർ ജനറൽ നാസർ ബൂസലൈബ് പറഞ്ഞു.

കഴിഞ്ഞ 24 മണിക്കൂറിനിടെ പ്രതിരോധ ഇടപെടലുകളിൽ നിന്നുണ്ടായ അവശിഷ്ടങ്ങൾ വീണതായി 14 റിപ്പോർട്ടുകൾ സ്ഫോടകവസ്തു നിർവീര്യമാക്കുന്ന സംഘം കൈകാര്യം ചെയ്തു. ആക്രമണം ആരംഭിച്ചതിനു ശേഷം ഇതുവരെ 579 റിപ്പോർട്ടുകൾക്ക് നടപടിയെടുത്തിട്ടുണ്ട്. ആക്രമണം ആരംഭിച്ചതിന് ശേഷം ആകെ 146 തവണ സൈറൺ പ്രവർത്തിപ്പിച്ചിട്ടുണ്ടെന്നും അധികൃതർ അറിയിച്ചു. അടിയന്തര സാഹചര്യങ്ങളിൽ പൗരന്മാർക്കും താമസക്കാർക്കും മുന്നറിയിപ്പ് നൽകാൻ സ്മാർട്ട് ഉപകരണങ്ങളിലൂടെ പ്രവർത്തിക്കുന്ന എർലി വാർണിംഗ് സിസ്റ്റവും സജീവമാക്കിയതായി മന്ത്രാലയം വ്യക്തമാക്കി.

രാജ്യത്തിന്റെ സുരക്ഷയും സ്ഥിരതയും ഉറപ്പാക്കാൻ ആഭ്യന്തര മന്ത്രാലയം 24 മണിക്കൂറും സാഹചര്യം നിരീക്ഷിച്ച് ആവശ്യമായ നടപടികൾ തുടരുമെന്നും അധികൃതർ കൂട്ടിച്ചേർത്തു.

പശ്ചിമേഷ്യൻ യുദ്ധം; ഗൾഫ് ഹോട്ടലുകളും വിമാനത്താവളങ്ങളും വലയുന്നു

conflict in Middle East ന്യൂഡല്‍ഹി: ഇറാൻ ലക്ഷ്യമിട്ടുള്ള അമേരിക്കൻ-ഇസ്രായേൽ യുദ്ധം നാലാം വാരത്തിലേക്ക് കടക്കുമ്പോൾ പശ്ചിമേഷ്യൻ രാജ്യങ്ങളിലെ സാമ്പത്തിക മേഖലയ്ക്ക് കനത്ത തിരിച്ചടി. യുദ്ധം കാരണം ടൂറിസം, വ്യോമയാന മേഖലകളിൽ മാത്രം ഇതുവരെ 12 ബില്യൺ ഡോളറിന്റെ നഷ്ടമുണ്ടായതായി വേൾഡ് ട്രാവൽ ആൻഡ് ടൂറിസം കൗൺസിൽ വെളിപ്പെടുത്തി. ഫെബ്രുവരി 28 മുതൽ മാർച്ച് 20 വരെയുള്ള കണക്കുകൾ പ്രകാരം പശ്ചിമേഷ്യൻ ടൂറിസം മേഖലയിൽ പ്രതിദിനം 600 മില്യൺ ഡോളറിന്റെ നഷ്ടമാണ് രേഖപ്പെടുത്തുന്നത്. മിക്ക ഗൾഫ് രാജ്യങ്ങളിലെയും വിമാനത്താവളങ്ങളുടെ പ്രവർത്തനം തടസ്സപ്പെട്ടതാണ് ഈ വൻ തകർച്ചയ്ക്ക് പ്രധാന കാരണം. 12 ബില്യൺ ഡോളർ (കഴിഞ്ഞ 20 ദിവസത്തിനിടെ) ആണ് ആകെ നഷ്ടം. പ്രതിദിന നഷ്ടം 600 മില്യൺ ഡോളർ ആണ്. യുദ്ധമില്ലായിരുന്നെങ്കിൽ 2026-ൽ മേഖലയിലെ ടൂറിസം വരുമാനം 207 ബില്യൺ ഡോളറിലെത്തുമായിരുന്നു. കുവൈത്തിലെ ടൂറിസം, ഹോട്ടൽ മേഖലയെയും യുദ്ധം കാര്യമായി ബാധിച്ചിട്ടുണ്ട്.

അമിത വില ഈടാക്കുന്നവരാണോ? കുവൈത്ത് സ്വർണ്ണ വിപണിയിൽ വ്യാപക പരിശോധന

Shopkeeper Overcharges kuwait കുവൈത്ത് സിറ്റി: ഉപഭോക്താക്കളുടെ അവകാശങ്ങൾ സംരക്ഷിക്കുന്നതിനും വിപണിയിലെ അമിതവില നിയന്ത്രിക്കുന്നതിനുമായി കുവൈത്ത് വാണിജ്യ വ്യവസായ മന്ത്രാലയം പരിശോധന ശക്തമാക്കി. സ്വർണ്ണ വിപണി കേന്ദ്രീകരിച്ച് നടത്തിയ പ്രത്യേക പരിശോധനയിൽ നിയമലംഘനം നടത്തിയ നിരവധി സ്ഥാപനങ്ങൾക്കെതിരെ മന്ത്രാലയം നടപടിയെടുത്തു. സ്വർണ്ണം വിൽക്കാൻ വിസമ്മതിക്കുക, നിശ്ചയിച്ചതിലും കൂടുതൽ തുക ഈടാക്കുക, വൻതോതിൽ വാങ്ങിയാൽ മാത്രമേ വിൽപന നടത്തൂ എന്ന് നിർബന്ധിക്കുക തുടങ്ങിയ പരാതികളുടെ അടിസ്ഥാനത്തിലായിരുന്നു സ്വർണ്ണ വിപണിയിലെ പരിശോധന. ക്യാപിറ്റൽ ഗവർണറേറ്റിലെ അഞ്ച് സ്വർണ്ണക്കടകൾക്കെതിരെ നിയമലംഘനത്തിന് കേസെടുത്തു. ഇറാനിൽ യുദ്ധം ആരംഭിച്ചതിന് ശേഷം ഇതുവരെ 322 നിയമലംഘനങ്ങളാണ് മന്ത്രാലയം രേഖപ്പെടുത്തിയത്. സ്വർണ്ണക്കടകൾക്ക് പുറമെ സൂപ്പർമാർക്കറ്റുകൾ, ജ്യൂസ് കടകൾ, ഇറച്ചി മാർക്കറ്റുകൾ, വാട്ടർ ടാങ്കർ സർവീസുകൾ എന്നിവിടങ്ങളിലും പരിശോധന നടന്നു. നിശ്ചിത അളവിൽ കൂടുതൽ സ്വർണ്ണം വാങ്ങിയാലേ വിൽപന നടത്തൂ എന്ന് കടയുടമകൾ വാശിപിടിക്കുന്നതായി ഉപഭോക്താക്കൾ പരാതിപ്പെട്ടിരുന്നു. ഇത് വിപണിയുടെ സുതാര്യതയെ ബാധിക്കുന്ന നിയമവിരുദ്ധമായ പ്രവൃത്തിയാണെന്ന് മന്ത്രാലയം വ്യക്തമാക്കി. അമിതവില ഈടാക്കൽ, വാണിജ്യ തട്ടിപ്പ്, ഉൽപ്പന്നങ്ങളുടെ തൂക്കത്തിൽ കുറവ് വരുത്തൽ തുടങ്ങിയവയും കണ്ടെത്തിയിട്ടുണ്ട്. പരിശോധനയിൽ ഏറ്റവും കൂടുതൽ നിയമലംഘനങ്ങൾ റിപ്പോർട്ട് ചെയ്തത് ഫർവാനിയ, അഹമ്മദി ഗവർണറേറ്റുകളിലാണ്. ജഹ്‌റ, ക്യാപിറ്റൽ, ഹവല്ലി, മുബാറക് അൽ കബീർ എന്നിവിടങ്ങളിലും പരിശോധനകൾ തുടരുകയാണ്. ഗുരുതരമായ നിയമലംഘനം കണ്ടെത്തിയ 10 കേന്ദ്ര മാർക്കറ്റുകളും കടകളും അടപ്പിച്ചു. ലൈസൻസില്ലാത്ത ഒരു വെയർഹൗസും പരിശോധനയിൽ പൂട്ടിച്ചു. പബ്ലിക് അതോറിറ്റി ഫോർ ഫുഡ് ആൻഡ് ന്യൂട്രീഷനുമായി ചേർന്നാണ് ഭക്ഷ്യ സുരക്ഷാ പരിശോധനകൾ നടക്കുന്നത്. വിപണിയിൽ ഏതെങ്കിലും തരത്തിലുള്ള ക്രമക്കേടുകളോ അമിതവിലയോ ശ്രദ്ധയിൽപ്പെട്ടാൽ ഔദ്യോഗിക ചാനലുകൾ വഴി പരാതിപ്പെടാൻ മന്ത്രാലയം ആവശ്യപ്പെട്ടു.

കുവൈത്തിലെ തുറമുഖങ്ങൾക്ക് നേരെ ഡ്രോൺ ആക്രമണം; നാശനഷ്ടങ്ങൾ സംഭവിച്ചു

Drone attack Kuwaiti ports കുവൈത്ത് സിറ്റി: കുവൈത്തിലെ സുപ്രധാന തുറമുഖങ്ങളെ ലക്ഷ്യമിട്ട് വെള്ളിയാഴ്ച പുലർച്ചെ ഡ്രോൺ ആക്രമണം. യുവൈഖ്, മുബാറക് അൽ കബീർ എന്നീ തുറമുഖങ്ങൾക്ക് നേരെയാണ് ശത്രു ഡ്രോണുകൾ ആക്രമണം നടത്തിയത്. ആക്രമണത്തിൽ നാശനഷ്ടങ്ങൾ സംഭവിച്ചെങ്കിലും ആളപായമൊന്നും റിപ്പോർട്ട് ചെയ്തിട്ടില്ലെന്ന് സർക്കാർ വക്താക്കൾ അറിയിച്ചു. വെള്ളിയാഴ്ച പുലർച്ചെയുണ്ടായ ആക്രമണത്തെത്തുടർന്ന് രാജ്യത്തെ സുരക്ഷാ ഏജൻസികൾ അതീവ ജാഗ്രതയിലാണ്. ഡ്രോണുകളും ലോയിറ്ററിംഗ് മ്യുണിഷനുകളും ഉപയോഗിച്ചാണ് തുറമുഖങ്ങളുടെ അടിസ്ഥാന സൗകര്യങ്ങളെ ലക്ഷ്യം വെച്ചതെന്ന് അധികൃതർ സ്ഥിരീകരിച്ചു. യുവൈഖ് തുറമുഖത്ത് പുലർച്ചെയുണ്ടായ ഡ്രോൺ ആക്രമണത്തിൽ തുറമുഖത്ത് നാശനഷ്ടങ്ങൾ സംഭവിച്ചതായി കുവൈത്ത് പോർട്ട് അതോറിറ്റി അറിയിച്ചു. ഗവൺമെന്റ് കമ്മ്യൂണിക്കേഷൻ സെന്റർ പുറത്തിറക്കിയ പ്രസ്താവന പ്രകാരം നിലവിൽ സ്ഥിതിഗതികൾ നിയന്ത്രണവിധേയമാണ്. മുബാറക് അൽ കബീർ തുറമുഖത്ത് ഇവിടെയും ഡ്രോണുകൾ ഉപയോഗിച്ചാണ് ആക്രമണം നടത്തിയത്. തുറമുഖത്തെ പ്രധാന അടിസ്ഥാന സൗകര്യങ്ങൾക്ക് കേടുപാടുകൾ സംഭവിച്ചതായി പൊതുമരാമത്ത് മന്ത്രാലയം വ്യക്തമാക്കി. രണ്ട് തുറമുഖങ്ങളിലും ആർക്കും പരിക്കേൽക്കുകയോ ജീവഹാനി സംഭവിക്കുകയോ ചെയ്തിട്ടില്ല എന്നത് ആശ്വാസകരമാണ്. സംഭവത്തിന് തൊട്ടുപിന്നാലെ അടിയന്തര പ്രതികരണ സംവിധാനങ്ങൾ സജീവമാക്കുകയും വിവിധ സർക്കാർ ഏജൻസികൾ ഏകോപിച്ച് സ്ഥിതിഗതികൾ വിലയിരുത്തുകയും ചെയ്തു. നാശനഷ്ടങ്ങളുടെ കൃത്യമായ വ്യാപ്തി കണക്കാക്കുന്നതിനായി സുരക്ഷാ-രക്ഷാപ്രവർത്തന സംഘങ്ങൾ സ്ഥലത്ത് പരിശോധന തുടരുകയാണ്. തുറമുഖങ്ങളിലും മറ്റ് തന്ത്രപ്രധാന കേന്ദ്രങ്ങളിലും സുരക്ഷാ നിരീക്ഷണം ശക്തമാക്കിയിട്ടുണ്ട്.

ഇന്ത്യയിൽ നിന്ന് ഗൾഫിലേക്ക് പ്രത്യേക വിമാനങ്ങളിൽ ഭക്ഷ്യശേഖരമെത്തും; ലുലു ഗ്രൂപ്പിന്റെ നീക്കത്തിന് കേന്ദ്രത്തിന്റെ പൂർണ്ണ പിന്തുണ

GCC food supply chains ന്യൂഡൽഹി: ജിസിസി രാജ്യങ്ങളിലേക്കുള്ള ഭക്ഷ്യവസ്തുക്കളുടെ തടസ്സമില്ലാത്ത വിതരണം ഉറപ്പാക്കുന്നതിൽ ഇന്ത്യ നിർണ്ണായക പങ്ക് വഹിക്കുന്നത് തുടരുന്നു. നിലവിലെ വെല്ലുവിളികൾക്കിടയിലും ഭക്ഷ്യസുരക്ഷ ഉറപ്പാക്കാൻ ലുലു ഗ്രൂപ്പ് നടപ്പിലാക്കുന്ന വിവിധ പദ്ധതികളെക്കുറിച്ച് ഗ്രൂപ്പ് ചെയർമാൻ എം.എ. യൂസഫലി പ്രധാനമന്ത്രി നരേന്ദ്ര മോദിയെ നേരിട്ട് കണ്ട് വിശദീകരിച്ചു. ന്യൂഡൽഹിയിലെ പ്രധാനമന്ത്രിയുടെ ഔദ്യോഗിക വസതിയിൽ വെച്ചായിരുന്നു കൂടിക്കാഴ്ച. ലക്ഷക്കണക്കിന് ഇന്ത്യൻ പ്രവാസികൾ താമസിക്കുന്ന ഗൾഫ് മേഖലയിൽ ഇന്ത്യൻ ഭക്ഷ്യോത്പന്നങ്ങളുടെ ലഭ്യത ഉറപ്പാക്കുന്നതിനും വിലക്കയറ്റം തടയുന്നതിനുമുള്ള നടപടികൾ ചർച്ചയിൽ പ്രധാന വിഷയമായി. ഇതുവരെ 34 പ്രത്യേക ചാർട്ടേഡ് വിമാനങ്ങൾ വഴി ഇന്ത്യയിൽ നിന്ന് ഗൾഫിലേക്ക് ഭക്ഷ്യവസ്തുക്കൾ എത്തിച്ചു. വരും ദിവസങ്ങളിലും സമാനമായ രീതിയിൽ വിമാനങ്ങൾ സർവീസ് നടത്തും. കപ്പലുകൾ വഴിയും വിമാനങ്ങൾ വഴിയുമായി ഇതുവരെ 15,000 ടൺ ഭക്ഷ്യശേഖരമാണ് ലുലു ഗ്രൂപ്പ് ജിസിസി വിപണികളിൽ എത്തിച്ചത്. ജിസിസിയിലുടനീളമുള്ള 280-ലധികം ഹൈപ്പർമാർക്കറ്റുകൾ വഴി അത്യാവശ്യ സാധനങ്ങൾ ജനങ്ങളിലേക്ക് എത്തിക്കാനും പരിഭ്രാന്തരായി സാധനങ്ങൾ വാങ്ങിക്കൂട്ടുന്ന സാഹചര്യം ഒഴിവാക്കാനും ലുലു ഗ്രൂപ്പ് മുൻകൈ എടുക്കുന്നുണ്ട്. വിവിധ ഇന്ത്യൻ സംസ്ഥാനങ്ങളിലുള്ള ലുലുവിന്റെ സ്വന്തം പ്രൊഡക്ഷൻ-ലോജിസ്റ്റിക്സ് ഹബ്ബുകൾ വഴി കർഷകരിൽ നിന്ന് നേരിട്ട് ഉത്പന്നങ്ങൾ ശേഖരിക്കുന്നു. വെല്ലുവിളി നിറഞ്ഞ ഈ കാലഘട്ടത്തിൽ ഇന്ത്യൻ കർഷകർക്കും കയറ്റുമതിക്കാർക്കും തങ്ങളുടെ ഉത്പന്നങ്ങൾ അന്താരാഷ്ട്ര വിപണിയിൽ എത്തിക്കാൻ ഈ നീക്കം വലിയ സഹായമാകുന്നുണ്ട്. ഭക്ഷ്യവസ്തുക്കളുടെ കയറ്റുമതി സുഗമമാക്കുന്നതിന് ഭാരത സർക്കാരിന്റെ ഭാഗത്തുനിന്ന് എല്ലാവിധ പിന്തുണയും പ്രധാനമന്ത്രി നരേന്ദ്ര മോദി ഉറപ്പുനൽകി. വരും ആഴ്ചകളിലും കൂടുതൽ ചാർട്ടേഡ് വിമാനങ്ങളും കാർഗോ കപ്പലുകളും ഉപയോഗിച്ച് വിതരണം ശക്തമായി തുടരാനാണ് ലുലു ഗ്രൂപ്പ് ലക്ഷ്യമിടുന്നത്. ഗൾഫിലെ സ്വദേശികൾക്കും വിദേശികൾക്കും ഒരുപോലെ പ്രിയപ്പെട്ട ഇന്ത്യൻ കാർഷിക ഉത്പന്നങ്ങളുടെ ലഭ്യതയിൽ യാതൊരു കുറവും വരുത്തില്ലെന്ന് എം.എ. യൂസഫലി അറിയിച്ചു.

കുവൈത്ത്: സ്ഫോടനശബ്ദങ്ങളിൽ പരിഭ്രാന്തരാകരുത്; ജാഗ്രത പാലിക്കാൻ സൈന്യത്തിന്റെ നിർദേശം

Missile Drone Attacks Kuwait കുവൈത്ത് സിറ്റി: വെള്ളിയാഴ്ച പുലർച്ചെയുണ്ടായ ശത്രുരാജ്യങ്ങളുടെ മിസൈൽ, ഡ്രോൺ ആക്രമണങ്ങളെ കുവൈറ്റ് വ്യോമപ്രതിരോധ സംവിധാനം വിജയകരമായി പ്രതിരോധിച്ചതായി ആർമി ജനറൽ സ്റ്റാഫ് സ്ഥിരീകരിച്ചു. രാജ്യത്തിന്റെ വിവിധ ഭാഗങ്ങളിൽ കേട്ട സ്ഫോടനശബ്ദങ്ങൾ പ്രതിരോധ പ്രവർത്തനങ്ങളുടെ ഭാഗമാണെന്ന് സൈന്യം ഔദ്യോഗിക പ്രസ്താവനയിൽ അറിയിച്ചു. രാജ്യത്തിന്റെ സുരക്ഷയ്ക്കും സ്ഥിരതയ്ക്കും ഭീഷണിയായ ആകാശ മാർഗ്ഗമുള്ള നീക്കങ്ങളെ കുവൈത്ത് സേന ശക്തമായി നേരിടുകയാണ്. നിലവിലെ സാഹചര്യം സൈന്യം സൂക്ഷ്മമായി നിരീക്ഷിച്ചുവരികയാണ്. കുവൈത്ത് വ്യോമപ്രതിരോധ യൂണിറ്റുകൾ ശത്രു മിസൈലുകളെയും ഡ്രോണുകളെയും ലക്ഷ്യസ്ഥാനത്ത് എത്തുന്നതിന് മുൻപ് തന്നെ ആകാശത്തുവെച്ച് തകർത്തു. ഇതിന്റെ ഫലമായാണ് പലയിടങ്ങളിലും സ്ഫോടനശബ്ദങ്ങൾ അനുഭവപ്പെട്ടത്. പൗരന്മാരും പ്രവാസികളും പരിഭ്രാന്തരാകരുത്. ഔദ്യോഗിക ഏജൻസികൾ നൽകുന്ന സുരക്ഷാ നിർദ്ദേശങ്ങൾ കർശനമായി പാലിക്കണം. രാജ്യത്തിന്റെ സുരക്ഷ ഉറപ്പാക്കാൻ പ്രതിരോധ സേന സദാസജ്ജമാണ്. ഭീഷണികൾ നേരിടാൻ ആവശ്യമായ എല്ലാ നടപടികളും തുടരുമെന്ന് അധികൃതർ വ്യക്തമാക്കി. 

Oman Air കുവൈത്ത് ഉൾപ്പെടെയുള്ള പ്രധാന സ്ഥലങ്ങളിലേക്കുള്ള വിമാന സർവ്വീസുകൾ റദ്ദാക്കി ഒമാൻ എയർ

Oman Air കുവൈത്ത് സിറ്റി: കുവൈത്ത് ഉൾപ്പെടെയുള്ള പ്രധാന സ്ഥലങ്ങളിലേക്കുള്ള വിമാന സർവ്വീസുകൾ റദ്ദാക്കി ഒമാൻ എയർ. മേഖലയിലുടനീളം വ്യോമാതിർത്തി അടച്ചിടൽ തുടരുന്നതിനാൽ നിരവധി അന്താരാഷ്ട്ര, പ്രാദേശിക വിമാന സർവ്വീസുകൾ താത്ക്കാലികമായി നിർത്തിവെച്ചതായി ഒമാൻ എയർ അറിയിച്ചു. ദുബായ് അന്താരാഷ്ട്ര വിമാനത്താവളം, ബഹ്‌റൈൻ അന്താരാഷ്ട്ര വിമാനത്താവളം, ഹമദ് അന്താരാഷ്ട്ര വിമാനത്താവളം, കുവൈത്ത് അന്താരാഷ്ട്ര വിമാനത്താവളം, ഖസബ് വിമാനത്താവളം എന്നിവ ഉൾപ്പെടെ പ്രധാന സ്ഥലങ്ങളിലേക്കുള്ള സർവ്വീസുകൾ 2026 ഏപ്രിൽ 15 വരെ റദ്ദാക്കുമെന്ന് ഒമാൻ എയർ വ്യക്തമാക്കി.

ബുക്കിംഗുകൾ തടസപ്പെട്ട യാത്രക്കാർ ഔദ്യോഗിക വെബ്‌സൈറ്റ് അല്ലെങ്കിൽ മൊബൈൽ ആപ്ലിക്കേഷൻ വഴി റിസർവ്വേഷനുകൾ കൈകാര്യം ചെയ്യണമെന്ന് എയർലൈൻ നിർദ്ദേശം നൽകി. സ്ഥിതിഗതികൽ മെച്ചപ്പെടുന്നതോടെ അമ്മാനിലേക്കും ദമ്മാമിലേക്കുമുള്ള വിമാന സർവ്വീസുകൾ 2026 ഏപ്രിൽ ഒന്നു മുതൽ പുന:രാംരംഭിക്കും. യാത്രക്കാർക്കുണ്ടായ ബുദ്ധിമുട്ടിൽ ഖേദം പ്രകടിപ്പിക്കുന്നുവെന്നും എയർലൈൻസ് അധികൃതർ കൂട്ടിച്ചേർത്തു.