Update Academic Qualifications kuwait കുവൈത്ത് സിറ്റി: വിദ്യാഭ്യാസ യോഗ്യത ഇതുവരെ പുതുക്കാത്ത ജീവനക്കാർ നടപടികൾ ഉടൻ പൂർത്തിയാക്കണമെന്ന് കുവൈത്ത് വിവര മന്ത്രാലയം അറിയിച്ചു. ആവശ്യമായ രേഖകൾ സഹിതം മന്ത്രാലയം അംഗീകരിച്ച ഇലക്ട്രോണിക് സംവിധാനത്തിലൂടെ യോഗ്യതാ വിവരങ്ങൾ അപ്ഡേറ്റ് ചെയ്യണം. 2026/25-ാം നമ്പർ അഡ്മിനിസ്ട്രേറ്റീവ് സർക്കുലർ പ്രകാരം ഓഗസ്റ്റ് 27 വ്യാഴാഴ്ച വരെയാണ് ഇതിനുള്ള സമയപരിധി. ബന്ധപ്പെട്ട എല്ലാ ജീവനക്കാരും നിശ്ചിത സമയത്തിനകം നടപടികൾ പൂർത്തിയാക്കണമെന്ന് മന്ത്രാലയം നിർദേശിച്ചു. നിശ്ചിത സമയത്തിനുള്ളിൽ വിദ്യാഭ്യാസ യോഗ്യത പുതുക്കുകയോ ആവശ്യമായ രേഖകൾ സമർപ്പിക്കുകയോ ചെയ്യാത്ത ജീവനക്കാർ അതിന്റെ തുടർഫലങ്ങളുടെ പൂർണ ഉത്തരവാദിത്തം വഹിക്കേണ്ടിവരുമെന്നും മന്ത്രാലയം മുന്നറിയിപ്പ് നൽകി. സിവിൽ സർവീസ് കമ്മിഷന്റെ ചട്ടങ്ങളും തീരുമാനങ്ങളും അനുസരിച്ച് ആവശ്യമായ നിയമ, ഭരണ നടപടികൾ സ്വീകരിക്കുമെന്നും വ്യക്തമാക്കി. സർക്കാർ, സ്വകാര്യ മേഖലയിലെ സ്ഥാപനങ്ങളിലെ ജീവനക്കാരുടെ വിദ്യാഭ്യാസ സർട്ടിഫിക്കറ്റുകൾ പരിശോധിക്കുന്നതിനായി രൂപീകരിച്ച കമ്മിറ്റിയുടെ പ്രവർത്തനങ്ങളുടെ ഭാഗമായാണ് നടപടി. സ്വദേശികളും പ്രവാസികളും ഇതിൽ ഉൾപ്പെടും. ബന്ധപ്പെട്ട അധികൃതരുടെ ആവശ്യകതകൾ പാലിക്കുന്നുണ്ടെന്ന് ഉറപ്പാക്കുന്നതിനും ജീവനക്കാരുടെ തൊഴിൽ വിവരങ്ങളുടെ കൃത്യതയും പൂർണതയും പരിശോധിക്കുന്നതിനുമാണ് വിദ്യാഭ്യാസ യോഗ്യത പുതുക്കുന്ന നടപടിയെന്ന് മന്ത്രാലയം അറിയിച്ചു. മന്ത്രാലയം നിർദേശിച്ച ഇലക്ട്രോണിക് സംവിധാനത്തിലൂടെ വിദ്യാഭ്യാസ യോഗ്യതയും അനുബന്ധ രേഖകളും സമർപ്പിക്കണം. https://ehub.media.gov.kw/ എന്ന വെബ്സൈറ്റ് വഴി വിവരങ്ങൾ പുതുക്കി പൂർത്തിയാക്കാൻ ജീവനക്കാർക്ക് നിർദ്ദേശം നൽകിയിട്ടുണ്ട്.
