Security crackdown in Kuwait കുവൈത്ത് സിറ്റി: അഹമ്മദി ഗവർണറേറ്റിലെ മെഹബൂലയിൽ കുവൈറ്റ് ആഭ്യന്തര മന്ത്രാലയം നടത്തിയ വിപുലമായ സുരക്ഷാ പരിശോധനയിൽ വൻ നിയമലംഘനങ്ങൾ കണ്ടെത്തി. രാജ്യത്തെ സുരക്ഷ ശക്തമാക്കുന്നതിനും നിയമവാഴ്ച ഉറപ്പാക്കുന്നതിനുമായി നടത്തിയ പരിശോധനയിൽ പിടികിട്ടാപ്പുള്ളികളും താമസ നിയമം ലംഘിച്ചവരുമടക്കം നിരവധി പേരെയാണ് പോലീസ് പിടികൂടിയത്. അഹമ്മദി ഗവർണർ ഷെയ്ഖ് ഹമൂദ് ജാബർ അൽ അഹമ്മദ് അൽ സബാഹിന്റെ സാന്നിധ്യത്തിൽ നടന്ന മിന്നൽ പരിശോധനയ്ക്ക് പബ്ലിക് സെക്യൂരിറ്റി അഫയേഴ്സ് അസിസ്റ്റന്റ് അണ്ടർ സെക്രട്ടറി മേജർ ജനറൽ ഹമദ് അഹമ്മദ് അൽ മുനൈഫി, ട്രാഫിക് ആൻഡ് ഓപ്പറേഷൻസ് സെക്ടർ മേധാവി ബ്രിഗേഡിയർ ജനറൽ അഹമ്മദ് ഫഹദ് അൽ അസ്മി എന്നിവർ നേരിട്ട് നേതൃത്വം നൽകി.

പരിശോധനയിലെ പ്രധാന കണ്ടെത്തലുകൾ:
790 ട്രാഫിക് നിയമലംഘനങ്ങൾ രേഖപ്പെടുത്തി.
വിവിധ കുറ്റകൃത്യങ്ങളിൽ പ്രതികളായ 109 പിടികിട്ടാപ്പുള്ളികളെ അറസ്റ്റ് ചെയ്തു.
താമസരേഖകളുടെ കാലാവധി കഴിഞ്ഞ 62 പേർ പിടിയിലായി.
തിരിച്ചറിയൽ രേഖകൾ കൈവശമില്ലാത്ത 31 പേരെ കസ്റ്റഡിയിലെടുത്തു.
മദ്യലഹരിയിൽ കണ്ടെത്തിയ 11 പേരെ പിടികൂടി.
വിവിധ കേസുകളിൽ തിരയുന്ന 9 വാഹനങ്ങൾ പിടിച്ചെടുത്തു.
മയക്കുമരുന്നും മദ്യക്കുപ്പികളുമായി 8 പേർ പിടിയിലായി.
പിടിയിലായവർക്കെതിരെ ആവശ്യമായ നിയമനടപടികൾ സ്വീകരിച്ചതായും ഇവരെ തുടർനടപടികൾക്കായി ബന്ധപ്പെട്ട വകുപ്പുകൾക്ക് കൈമാറിയതായും ആഭ്യന്തര മന്ത്രാലയം അറിയിച്ചു. നിയമലംഘകർക്കായി വരും ദിവസങ്ങളിലും രാജ്യവ്യാപകമായി പരിശോധന തുടരുമെന്ന് അധികൃതർ വ്യക്തമാക്കി.

കുവൈത്തിലെ പുതിയ ജോലി അവസരങ്ങൾ പുതിയ അറിയുവാൻ ഇവിടെ ക്ലിക്ക് ചെയ്യുക

കുവൈത്തിൽ തീപ്പൊരി ചൂട്; താപനില 49 ഡിഗ്രിയിലേക്ക്, വാരാന്ത്യ കാലാവസ്ഥ ഇങ്ങനെ

weather across kuwait weekend കുവൈത്ത് സിറ്റി: കുവൈത്തിൽ വാരാന്ത്യത്തിൽ കടുത്ത ചൂടും ഉയർന്ന ഈർപ്പവും അനുഭവപ്പെടുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. പകലിൽ അത്യുഷ്ണം അനുഭവപ്പെടുമ്പോൾ രാത്രിയിൽ ചൂടുള്ളതോ സുഖകരമായതോ ആയ കാലാവസ്ഥയായിരിക്കും തുടരുകയെന്ന് വകുപ്പ് ആക്ടിംഗ് ഡയറക്ടർ ധീരാർ അൽ അലി വ്യക്തമാക്കി. ഇന്ത്യൻ സീസണൽ ന്യൂനമർദ്ദത്തിന്റെ ഫലമായി രാജ്യത്തേക്ക് ഉഷ്ണക്കാറ്റും ഈർപ്പമുള്ള വായുവും പ്രവേശിക്കുന്നതാണ് ചൂട് വർധിക്കാൻ കാരണം. വ്യാഴാഴ്ച പകലിൽ തീരപ്രദേശങ്ങളിൽ കടുത്ത ഈർപ്പവും ചൂടും അനുഭവപ്പെട്ടു. പരമാവധി താപനില 47 മുതൽ 49 ഡിഗ്രി സെൽഷ്യസ് വരെ ഉയർന്നേക്കാം. ആകാശത്ത് മേഘങ്ങൾ കാണപ്പെടുമെന്നും ചിലയിടങ്ങളിൽ നേരിയ മഴയ്ക്ക് സാധ്യതയുണ്ടെന്നും കാലാവസ്ഥാ കേന്ദ്രം അറിയിച്ചു. വ്യാഴാഴ്ച രാത്രി അന്തരീക്ഷം ചൂടുള്ളതായിരിക്കും. തീരപ്രദേശങ്ങളിൽ ഈർപ്പം കൂടുതലായിരിക്കും. താപനില 29 മുതൽ 31 ഡിഗ്രി സെൽഷ്യസ് വരെ കുറയാൻ സാധ്യതയുണ്ട്. കടൽ തിരമാലകൾ ഒന്നു മുതൽ മൂന്ന് അടി വരെ ഉയരത്തിൽ ശാന്തമായിരിക്കും. വെള്ളിയാഴ്ച പകൽ സമയം കടുത്ത ചൂട് അനുഭവപ്പെടും. തീരപ്രദേശങ്ങളിൽ ഈർപ്പം നിലനിൽക്കും. കാറ്റ് മണിക്കൂറിൽ 8 മുതൽ 30 കിലോമീറ്റർ വേഗതയിൽ വീശാൻ സാധ്യതയുണ്ട്. ശനിയാഴ്ച അത്യുഷ്ണം തുടരും. വടക്ക്-പടിഞ്ഞാറൻ ദിശയിൽ നിന്നുള്ള കാറ്റ് മിതമായ വേഗതയിൽ വീശും. ചിലയിടങ്ങളിൽ ആകാശം ഭാഗികമായി മേഘാവൃതമായിരിക്കും. ചൂട് കടുക്കുന്ന സാഹചര്യത്തിൽ പുറംജോലികളിൽ ഏർപ്പെടുന്നവരും യാത്രക്കാരും ആവശ്യമായ മുൻകരുതലുകൾ സ്വീകരിക്കണമെന്ന് അധികൃതർ നിർദ്ദേശിച്ചു.