Kuwait Pharmacies കുവൈത്ത് സിറ്റി: നിയമപരവും നിയന്ത്രണപരവുമായ ലംഘനങ്ങൾ കണ്ടെത്തിയതിനെത്തുടർന്ന് കുവൈത്തിൽ രണ്ട് സ്വകാര്യ ഫാർമസികളുടെ ലൈസൻസ് റദ്ദാക്കുകയും ഒരെണ്ണത്തിന്റെ പ്രവർത്തനം ആറ് മാസത്തേക്ക് നിർത്തിവെക്കുകയും ചെയ്തതായി ആരോഗ്യ മന്ത്രാലയം അറിയിച്ചു. ആരോഗ്യ മന്ത്രി ഡോ. അഹമ്മദ് അബ്ദുൾ വഹാബ് അൽ-അവാധിയാണ് ഇതുസംബന്ധിച്ച ഉത്തരവ് പുറപ്പെടുവിച്ചത്. 2025-ലെ 237-ാം നമ്പർ മന്ത്രാലയ പ്രമേയത്തിലെ ലൈസൻസിംഗ് ചട്ടങ്ങൾ ലംഘിച്ച രണ്ട് ഫാർമസികളുടെ ലൈസൻസാണ് റദ്ദാക്കിയത്. മുൻകൂർ അനുമതിയില്ലാതെ ആറ് മാസത്തിലേറെയായി പ്രവർത്തനം നടത്താതെ ലൈസൻസ് ദുരുപയോഗം ചെയ്തുവെന്ന് അധികൃതർ കണ്ടെത്തി. ഡോക്ടറുടെ കുറിപ്പടിയില്ലാതെ മരുന്നുകൾ വിറ്റതിനും സ്റ്റോക്ക് രേഖകളിൽ കൃത്രിമം കാണിച്ചതിനുമാണ് മൂന്നാമത്തെ ഫാർമസിക്ക് ആറ് മാസത്തെ സസ്പെൻഷൻ നൽകിയത്. യഥാർത്ഥ സ്റ്റോക്കും രേഖകളും തമ്മിൽ വലിയ വ്യത്യാസമുള്ളതായി പരിശോധനയിൽ തെളിഞ്ഞു. പൊതുജനാരോഗ്യം സംരക്ഷിക്കുന്നതിനും മരുന്നുകളുടെ വിതരണം സുരക്ഷിതമായി നടക്കുന്നുവെന്ന് ഉറപ്പാക്കുന്നതിനും പരിശോധനകൾ ശക്തമായി തുടരുമെന്ന് മന്ത്രാലയം വ്യക്തമാക്കി. നിയമങ്ങൾ ലംഘിക്കുന്നവർക്കെതിരെ വിട്ടുവീഴ്ചയില്ലാത്ത നിയമനടപടികൾ സ്വീകരിക്കുമെന്നും അധികൃതർ മുന്നറിയിപ്പ് നൽകി.

കുവൈത്ത് വിമാനത്താവളത്തിലെ പുതിയ ടെർമിനൽ നിർമ്മാണം പുരോഗമിക്കുന്നു

Kuwait New Airport Terminal 2 കുവൈത്ത് സിറ്റി: കുവൈത്ത് അന്താരാഷ്ട്ര വിമാനത്താവളത്തിലെ പുതിയ പാസഞ്ചർ ടെർമിനൽ (T2) പദ്ധതിയുടെ നിർമ്മാണ പുരോഗതി വിലയിരുത്താൻ പൊതുമരാമത്ത് മന്ത്രി ഡോ. നൂറ അൽ മഷാൻ ബുധനാഴ്ച സ്ഥലസന്ദർശനം നടത്തി. പദ്ധതിയുടെ വിവിധ സാങ്കേതിക, എഞ്ചിനീയറിംഗ് ഘട്ടങ്ങളുടെ നിലവിലെ സ്ഥിതി മന്ത്രി നേരിട്ട് പരിശോധിച്ചു. പദ്ധതിയിലെ വിവിധ ഭാഗങ്ങളിൽ സന്ദർശനം നടത്തിയ മന്ത്രി, നിർമ്മാണത്തിന്റെ നിലവിലെ തോത്, ഭാവി പദ്ധതികൾ എന്നിവയെക്കുറിച്ച് ഉദ്യോഗസ്ഥരിൽ നിന്നും എഞ്ചിനീയർമാരിൽ നിന്നും വിശദമായ റിപ്പോർട്ട് തേടി. ശേഷിക്കുന്ന നിർമ്മാണ ഘട്ടങ്ങളിൽ നേരിടാൻ സാധ്യതയുള്ള വെല്ലുവിളികളെക്കുറിച്ചും അവ പരിഹരിച്ച് നിശ്ചിത സമയപരിധിക്കുള്ളിൽ പദ്ധതി പൂർത്തിയാക്കുന്നതിനുള്ള സംവിധാനങ്ങളെക്കുറിച്ചും യോഗം ചർച്ച ചെയ്തു. നിർമ്മാണ പ്രവർത്തനങ്ങൾ വേഗത്തിലാക്കണമെന്നും എന്നാൽ ഗുണനിലവാരത്തിലും സുരക്ഷാ മാനദണ്ഡങ്ങളിലും യാതൊരു വിട്ടുവീഴ്ചയും പാടില്ലെന്നും മന്ത്രി നിർദ്ദേശം നൽകി. കുവൈത്തിന്റെ സിവിൽ ഏവിയേഷൻ മേഖലയിൽ ഈ പുതിയ പാസഞ്ചർ ടെർമിനൽ ഒരു തന്ത്രപ്രധാന നാഴികക്കല്ലാണെന്ന് ഡോ. നൂറ അൽ മഷാൻ വ്യക്തമാക്കി. രാജ്യത്തെ വിമാനയാത്രക്കാരുടെ വർദ്ധിച്ചുവരുന്ന തിരക്ക് പരിഹരിക്കാനും ആധുനിക യാത്രാ സൗകര്യങ്ങൾ ഒരുക്കാനും ഈ ബൃഹദ് പദ്ധതി സഹായിക്കുമെന്നും അവർ കൂട്ടിച്ചേർത്തു.

ഇന്ത്യയിൽ സ്വർണത്തിനും വെള്ളിക്കും വില കൂടും; ഇറക്കുമതി തീരുവ 15 ശതമാനമായി വർധിപ്പിച്ചു

India Hikes Gold and Silver രാജ്യത്തെ വർധിച്ചുവരുന്ന സ്വർണ്ണ ഉപഭോഗം കുറയ്ക്കുന്നതിനും രൂപയുടെ മൂല്യം സംരക്ഷിക്കുന്നതിനുമായി സ്വർണം, വെള്ളി എന്നിവയുടെ ഇറക്കുമതി തീരുവ കേന്ദ്ര സർക്കാർ കുത്തനെ വർദ്ധിപ്പിച്ചു. നിലവിലുണ്ടായിരുന്ന 6 ശതമാനത്തിൽ നിന്ന് 15 ശതമാനമായാണ് തീരുവ ഉയർത്തിയത്. മേയ് 13 ബുധനാഴ്ച മുതൽ പുതിയ നിരക്ക് പ്രാബല്യത്തിൽ വന്നു. അടിസ്ഥാന കസ്റ്റംസ് ഡ്യൂട്ടി 10 ശതമാനം. അഗ്രികൾച്ചർ ഇൻഫ്രാസ്ട്രക്ചർ സെസ് (AIDC) 5 ശതമാനം. ഇതോടെ ആകെ നികുതി മുൻപുണ്ടായിരുന്നതിനേക്കാൾ ഇരട്ടിയിലധികമായി വർദ്ധിച്ചു. സ്വർണ്ണത്തിന്റെ അമിതമായ ഇറക്കുമതി മൂലം വർദ്ധിച്ചുവരുന്ന വ്യാപാര കമ്മി നിയന്ത്രിക്കുക എന്നതാണ് പ്രധാന ലക്ഷ്യം. ആഗോള വിപണിയിലെ അനിശ്ചിതത്വങ്ങൾക്കിടയിൽ റെക്കോർഡ് തകർച്ച നേരിടുന്ന ഇന്ത്യൻ രൂപയുടെ മൂല്യം തിരിച്ചുപിടിക്കാൻ ഈ നടപടി സഹായിക്കും. തീരുവ വർദ്ധിപ്പിച്ചതിന് പിന്നാലെ ഡോളറിനെതിരെ രൂപയുടെ മൂല്യം 95.61 എന്ന നിലയിലേക്ക് ചെറിയ മുന്നേറ്റം നടത്തി. വിദേശനാണ്യ ശേഖരത്തിന്മേലുള്ള സമ്മർദ്ദം കുറയ്ക്കാൻ സ്വർണ്ണ ഇറക്കുമതി നിയന്ത്രിക്കണമെന്ന് പ്രധാനമന്ത്രി നേരത്തെ ആഹ്വാനം ചെയ്തിരുന്നു. ഇറക്കുമതി തീരുവ വർദ്ധിപ്പിച്ചതോടെ ആഭ്യന്തര വിപണിയിൽ സ്വർണ്ണത്തിനും വെള്ളിക്കും വില കുത്തനെ ഉയരും. ഇത് വിപണിയിലെ ആവശ്യം കുറയ്ക്കാൻ സഹായിക്കുമെന്ന് വിദഗ്ധർ കരുതുന്നു. എന്നാൽ, നികുതി വർദ്ധനവ് സ്വർണ്ണക്കടത്ത് കൂടാൻ കാരണമായേക്കാമെന്ന ആശങ്കയും വിപണി നിരീക്ഷകർ പങ്കുവെക്കുന്നുണ്ട്. നിലവിലെ ഭൗമരാഷ്ട്രീയ സാഹചര്യങ്ങളിൽ സുരക്ഷിത നിക്ഷേപമെന്ന നിലയിൽ സ്വർണ്ണത്തിന് ആവശ്യം ഏറുന്ന ഘട്ടത്തിലാണ് ഇന്ത്യയുടെ ഈ നിർണ്ണായക നീക്കം.

കുവൈത്തിൽ മലയാളി വിദ്യാർഥിനി കെട്ടിടത്തിൽ നിന്ന് വീണു മരിച്ചു

Malayali student dies in Kuwait കുവൈത്ത് സിറ്റി: കുവൈത്തിലെ അബ്ബാസിയയിൽ താമസ കെട്ടിടത്തിൽ നിന്ന് വീണ് മലയാളി വിദ്യാർത്ഥിനി മരിച്ചു. എറണാകുളം പെരുമ്പാവൂർ സ്വദേശിയായ ഫെബ ബിജു മാണി (14) ആണ് മരിച്ചത്. അബ്ബാസിയ ഹൈവേ മാർക്കറ്റിന് സമീപമുള്ള താമസ കെട്ടിടത്തിൽ ഇന്നലെ വൈകിട്ട് മൂന്നരയോടെയാണ് സംഭവം നടന്നത്. കെട്ടിടത്തിൽ നിന്ന് വീണ നിലയിലാണ് ഫെബയെ കണ്ടെത്തിയത്. പെരുമ്പാവൂർ ചിറക്കര മുറ്റത്ത് ബിജു സി. മാണിയുടെയും ലിബി ബിജുവിന്റെയും മകളാണ്. അന്ന ബിജു സഹോദരിയാണ്. അബ്ബാസിയ യുണൈറ്റഡ് ഇന്ത്യൻ സ്കൂളിലെ ഒൻപതാം ക്ലാസ് വിദ്യാർത്ഥിനിയായിരുന്നു ഫെബ. കുട്ടിയുടെ അപ്രതീക്ഷിത വേർപാടിൽ അബ്ബാസിയയിലെ മലയാളി സമൂഹവും സ്കൂൾ അധികൃതരും വൻ നടുക്കത്തിലാണ്. മൃതദേഹം നാട്ടിലെത്തിച്ച് സംസ്കരിക്കുന്നതിനായുള്ള നിയമനടപടികൾ കുവൈത്തിൽ പുരോഗമിക്കുകയാണ്. സംസ്കാരം പിന്നീട് നാട്ടിൽ നടക്കും.

യുദ്ധം മൂലം വിമാന ഇന്ധനവില കുതിച്ചുയരുന്നു; ആഗോള യാത്രകളിൽ 40 ശതമാനം വരെ കുറവുണ്ടാകുമെന്ന് പ്രമുഖ വിമാനസര്‍വീസ്

jazeera airways global travel മേഖലയിലെ യുദ്ധം ആഗോള വ്യോമയാന മേഖലയെ സാരമായി ബാധിച്ചതായി ജസീറ എയർവേയ്‌സ് ഗവൺമെന്റ് സെക്ടർ സിഇഒ നാസർ അൽ ഒബൈദ് വ്യക്തമാക്കി. ഹോർമുസ് കടലിടുക്ക് അടച്ചതോടെ ഗൾഫ് രാജ്യങ്ങളിൽ നിന്നും ഇറാനിൽ നിന്നുമുള്ള ഇന്ധന കയറ്റുമതി തടസ്സപ്പെട്ടതാണ് പ്രതിസന്ധിക്ക് പ്രധാന കാരണമെന്ന് അദ്ദേഹം ചൂണ്ടിക്കാട്ടി. ഈ വേനൽക്കാലത്തെ ആഗോള യാത്രാ സീസണിനെ യുദ്ധം 30 മുതൽ 40 ശതമാനം വരെ ദോഷകരമായി ബാധിക്കുമെന്ന് പ്രതീക്ഷിക്കുന്നു. യുദ്ധത്തിന് മുമ്പ് ബാരലിന് 82 ഡോളറായിരുന്ന വിമാന ഇന്ധനവില നിലവിൽ 230 ഡോളറായി കുതിച്ചുയർന്നു. ഇതാണ് വിമാനക്കമ്പനികൾ നേരിടുന്ന ഏറ്റവും വലിയ പ്രതിസന്ധി. ഇന്ധനവില വർധിച്ചതോടെ വിമാന ടിക്കറ്റ് നിരക്കുകൾ കുത്തനെ ഉയർന്നു. ഇത് ആഗോള വിമാന ഗതാഗത വിപണിയെ താളംതെറ്റിച്ചു. ടിക്കറ്റ് നിരക്ക് താങ്ങാനാവാതെ വന്നതോടെ ടൂറിസ്റ്റുകൾ വിമാനയാത്ര ഒഴിവാക്കി ട്രെയിൻ, ബസ് തുടങ്ങിയ മാർഗ്ഗങ്ങളിലേക്ക് മാറുകയാണ്. യുദ്ധസമയത്ത് ജസീറ എയർവേയ്‌സിന്റെ വിമാനങ്ങൾ സൗദി അറേബ്യ വഴി വഴിതിരിച്ചുവിട്ടിരുന്നതായി അൽ ഒബൈദ് പറഞ്ഞു. എന്നിരുന്നാലും കമ്പനിയുടെ പ്രവർത്തനങ്ങളെ ഇത് 25 ശതമാനം ബാധിച്ചു. മുമ്പ് യുദ്ധസമയത്ത് സൗദിയിൽ നിന്നായിരുന്നു ഇന്ധനം നിറച്ചിരുന്നത് എങ്കിൽ, ഇപ്പോൾ കുവൈറ്റ് ഫ്യുവൽ കമ്പനി (KAFCO) വഴി കുവൈത്തിൽ നിന്ന് തന്നെ ഇന്ധനം നിറയ്ക്കുന്നുണ്ട്. എന്നാൽ പഴയ നിരക്കിന് പകരം നിലവിലുള്ള ഉയർന്ന അന്താരാഷ്ട്ര വിലയ്ക്കാണ് ഇപ്പോൾ ഇന്ധനം വാങ്ങുന്നതെന്നും ഇത് പ്രവർത്തനങ്ങളെ ബാധിക്കുന്നുണ്ടെന്നും അദ്ദേഹം കൂട്ടിച്ചേർത്തു. വൻ സാമ്പത്തിക നഷ്ടം മൂലം ആഗോളതലത്തിൽ ചില വിമാനക്കമ്പനികൾ ഇതിനകം പാപ്പരായി പ്രഖ്യാപിക്കപ്പെട്ടതായും അദ്ദേഹം വെളിപ്പെടുത്തി.

കുവൈത്ത്: വീട്ടിൽ വൻ തീപിടിത്തം റിപ്പോര്‍ട്ട് ചെയ്തു

Kuwait House Fire കുവൈത്ത് സിറ്റി: കുവൈത്തിലെ സബാഹ് അൽ അഹമ്മദിൽസ്വദേശി കുടുംബത്തിന്റെ വീടിന് തീപിടിച്ച് ഒരു സ്ത്രീ മരിക്കുകയും കുട്ടികളുൾപ്പെടെ അഞ്ച് പേർക്ക് പരിക്കേൽക്കുകയും ചെയ്തു. പരിക്കേറ്റവരിൽ രണ്ട് പേരുടെ നില ഗുരുതരമാണ്. സബാഹ് അൽ അഹമ്മദിലെ വീടിന് തീപിടിച്ച വിവരം ലഭിച്ചയുടൻ സുരക്ഷാ സേനയും ആംബുലൻസുകളും സ്ഥലത്തെത്തി. അഗ്നിശമന സേനാംഗങ്ങൾ വീട്ടിലുണ്ടായിരുന്നവരെ പുറത്തെടുത്ത് ഉടൻ തന്നെ ആശുപത്രിയിലേക്ക് മാറ്റി. ഗുരുതരമായി പരിക്കേറ്റ കുവൈത്തി വനിത ആശുപത്രിയിൽ എത്തിയപ്പോഴേക്കും മരണപ്പെട്ടിരുന്നു. പരിക്കേറ്റ മൂന്ന് കുട്ടികളും രണ്ട് ഗാർഹിക തൊഴിലാളികളും നിലവിൽ ചികിത്സയിലാണ്. ഇതിൽ രണ്ട് പേരുടെ നില അതീവ ഗുരുതരമാണെന്ന് അധികൃതർ വ്യക്തമാക്കി. അൽ-കൗട്ട്, ആരിഫ്‌ജാൻഎന്നീ സ്റ്റേഷനുകളിൽ നിന്നുള്ള അഗ്നിശമന സേനാ വിഭാഗങ്ങൾ സംയുക്തമായാണ് തീ നിയന്ത്രണവിധേയമാക്കിയത്. കുവൈറ്റ് ഫയർ ഫോഴ്‌സ് രക്ഷാപ്രവർത്തനങ്ങൾക്ക് നേതൃത്വം നൽകി. തീപിടിത്തമുണ്ടാകാനുള്ള യഥാർത്ഥ കാരണം കണ്ടെത്താൻ അഗ്നിശമന സേനയും സുരക്ഷാ ഏജൻസികളും അന്വേഷണം ആരംഭിച്ചിട്ടുണ്ട്. അപകടത്തെക്കുറിച്ചുള്ള കൂടുതൽ വിവരങ്ങൾക്കായി അന്വേഷണ റിപ്പോർട്ട് കാത്തിരിക്കുകയാണ്.

നിയമവിരുദ്ധമായി ടാക്സി സർവീസ്; നാല് പ്രവാസികൾ കുവൈത്തിൽ പിടിയിൽ

expats illegally picking up passengers kuwait കുവൈത്ത് സിറ്റി: കുവൈത്തിൽ സ്വകാര്യ വാഹനങ്ങളിൽ നിയമവിരുദ്ധമായി യാത്രക്കാരെ കടത്തിയതിന് നാല് പ്രവാസികളെ ട്രാഫിക് ഉദ്യോഗസ്ഥർ അറസ്റ്റ് ചെയ്തു. അറബ്, ഏഷ്യൻ വംശജരായ പ്രവാസികളാണ് പിടിയിലായത്. സാധാരണ നിലയിലുള്ള പട്രോളിംഗിനിടെയാണ് ട്രാഫിക് ഉദ്യോഗസ്ഥർ ഇവരെ പിടികൂടിയത്. സ്വകാര്യ വാഹനങ്ങളിൽ നിയമവിരുദ്ധമായി യാത്രക്കാരെ കയറ്റുന്നത് ഉദ്യോഗസ്ഥരുടെ ശ്രദ്ധയിൽപ്പെടുകയായിരുന്നു. പിടിയിലായവർക്കെതിരെ ട്രാഫിക് നിയമലംഘനത്തിന് കേസെടുക്കുകയും അവർ ഉപയോഗിച്ചിരുന്ന വാഹനങ്ങൾ അധികൃതർ കണ്ടുകെട്ടുകയും ചെയ്തു. നിയമനടപടികൾക്കായി ഇവരെ ട്രാഫിക് പോലീസ് സ്റ്റേഷനിലേക്ക് മാറ്റിയിരിക്കുകയാണ്. അംഗീകൃത ലൈസൻസില്ലാതെ സ്വകാര്യ വാഹനങ്ങൾ ടാക്സിയായി ഉപയോഗിക്കുന്നവർക്കെതിരെ വരും ദിവസങ്ങളിലും പരിശോധന കർശനമാക്കുമെന്ന് സുരക്ഷാ വൃത്തങ്ങൾ അറിയിച്ചു.