leaked exams kuwait കുവൈത്ത് സിറ്റി: ചോദ്യപേപ്പർ ചോർച്ചയോ മറ്റ് നിയമവിരുദ്ധ വിവരങ്ങളോ പ്രചരിപ്പിക്കുന്ന ഗ്രൂപ്പുകളിൽ കുട്ടികൾ ചേരുന്നില്ലെന്ന് രക്ഷിതാക്കൾ ഉറപ്പുവരുത്തണമെന്നും അവർക്ക് ആവശ്യമായ മുന്നറിയിപ്പ് നൽകണമെന്നും കുവൈത്ത് ആഭ്യന്തര മന്ത്രാലയം. കുട്ടികളുടെ അവകാശ നിയമപ്രകാരമുള്ള നിയമനടപടികൾ ഒഴിവാക്കാൻ ഇത് അത്യാവശ്യമാണെന്ന് അൽ-സിയാസ ദിനപത്രം റിപ്പോർട്ട് ചെയ്തു. ഹൈസ്കൂൾ പരീക്ഷകൾക്ക് മുന്നോടിയായി സോഷ്യൽ മീഡിയ പ്ലാറ്റ്‌ഫോമുകളിൽ പങ്കുവെച്ച ബോധവൽക്കരണ സന്ദേശത്തിലാണ്, കുട്ടികളുടെ സുരക്ഷ ആരംഭിക്കുന്നത് രക്ഷിതാക്കളുടെ കൃത്യമായ മേൽനോട്ടത്തിലൂടെയാണെന്ന് മന്ത്രാലയം ഊന്നിപ്പറഞ്ഞത്. അതേസമയം, 2025/2026 അധ്യയന വർഷത്തെ സയൻസ്, ആർട്സ് സ്ട്രീമുകളിലെ പന്ത്രണ്ടാം ക്ലാസ് വിദ്യാർത്ഥികളുടെ അവസാന വട്ട പരീക്ഷകൾ ബുധനാഴ്ച ആരംഭിച്ചു. വിദ്യാഭ്യാസ മന്ത്രാലയത്തിന്റെ സമഗ്രമായ സംഘടനാ, ഭരണസംവിധാന, സാങ്കേതിക ഒരുക്കങ്ങളോടെയാണ് പരീക്ഷകൾക്ക് തുടക്കമായത്. പരീക്ഷാ സമിതികളുടെ റിപ്പോർട്ട് പ്രകാരം പുലർച്ചെ മുതൽ തന്നെ വിദ്യാർത്ഥികൾ കൃത്യമായി പരീക്ഷാ ഹാളുകളിൽ ഹാജരായി. അംഗീകൃത നിബന്ധനകൾക്കും നടപടിക്രമങ്ങൾക്കും വിധേയമായി പരീക്ഷകൾ സുഗമമായി നടത്തുന്നതിന് ആവശ്യമായ അന്തരീക്ഷം സ്കൂൾ അധികൃതർ ഒരുക്കിയിട്ടുണ്ട്.

കുവൈത്ത്: പൊതുസ്ഥലങ്ങളിലെ ട്രക്ക് പാർക്കിങ്ങിനെതിരെ നടപടി

Truck Ban Kuwait കുവൈത്ത് സിറ്റി: പൊതുചത്വരങ്ങളിലും ജനവാസ, നിക്ഷേപ, വാണിജ്യ മേഖലകളിലും ട്രക്കുകൾ, കനത്ത യന്ത്രസാമഗ്രികൾ, ബസുകൾ എന്നിവ അലക്ഷ്യമായി പാർക്ക് ചെയ്യുന്നത് വലിയൊരു പ്രശ്നമായി മാറിയിരിക്കുകയാണെന്ന് മുനിസിപ്പൽ കൗൺസിൽ അംഗവും ജഹ്‌റ ഗവർണറേറ്റ് കമ്മിറ്റി ചെയർമാനുമായ അബ്ദുള്ള അൽ-അനേസി പറഞ്ഞു. ഇത് ഗതാഗത സുരക്ഷ, നഗര ഭംഗി, പരിസ്ഥിതി, ജീവിതനിലവാരം എന്നിവയെ പ്രതികൂലമായി ബാധിക്കുന്നതിനാൽ ശാശ്വതവും സുസ്ഥിരവുമായ പരിഹാരങ്ങൾ ആവശ്യമാണെന്നും അദ്ദേഹം കൂട്ടിച്ചേർത്തു. മുനിസിപ്പൽ കൗൺസിൽ അംഗങ്ങളായ ഖാലിദ് അൽ-മുതൈരി, ഡോ. ഹസൻ കമൽ എന്നിവർ സമർപ്പിച്ച നിർദ്ദേശങ്ങളും ചോദ്യങ്ങളും വഴി കൗൺസിൽ ഈ വിഷയത്തിൽ ആവശ്യമായ നിയമനിർമ്മാണ നടപടികൾ സ്വീകരിച്ചിട്ടുണ്ട്. ഈ നിർദ്ദേശങ്ങൾ റിഫോം ആൻഡ് ഡെവലപ്‌മെന്റ് കമ്മിറ്റി ചർച്ച ചെയ്യുകയും, തുടർന്ന് കൗൺസിൽ പാസാക്കിയ പ്രമേയത്തിന് മുനിസിപ്പൽ-ഭവനകാര്യ സഹമന്ത്രി അംഗീകാരം നൽകുകയും ചെയ്തു. പുതിയ പ്രമേയപ്രകാരം കുവൈറ്റ് മുനിസിപ്പാലിറ്റി, പൊതുമരാമത്ത് മന്ത്രാലയം, ധനകാര്യ മന്ത്രാലയം എന്നിവ സംയുക്തമായി ട്രക്ക് പാർക്കിങ്ങിനായുള്ള സ്ഥലങ്ങൾ പുനർമൂല്യനിർണ്ണയം ചെയ്യും. ഈ സ്ഥലങ്ങൾ സംയോജിത നിക്ഷേപ സൗകര്യങ്ങളായി മാറ്റുന്നതിനും അവയുടെ നടത്തിപ്പ് ചുമതല ഏത് സർക്കാർ സ്ഥാപനത്തിനാണെന്ന് തീരുമാനിക്കുന്നതിനും ഈ ഏകോപനം സഹായിക്കും. ഇത് കാഴ്ച മലിനീകരണം കുറയ്ക്കാനും അടിസ്ഥാന സൗകര്യങ്ങൾ സംരക്ഷിക്കാനും സാമ്പത്തിക നേട്ടമുണ്ടാക്കാനും സഹായിക്കുമെന്ന് അൽ-അനേസി ഊന്നിപ്പറഞ്ഞു. ഗതാഗതക്കുരുക്ക് കുറയ്ക്കുന്നതിനും വാഹനങ്ങളുടെ സുഗമമായ യാത്ര ഉറപ്പാക്കുന്നതിനുമായി തിരക്കേറിയ സമയങ്ങളിൽ എല്ലാ റോഡുകളിലും ട്രക്കുകൾക്ക് ജനറൽ ട്രാഫിക് ഡിപ്പാർട്ട്‌മെന്റ് നിരോധനം ഏർപ്പെടുത്തിയതായി അൽ-സിയാസ ദിനപത്രം റിപ്പോർട്ട് ചെയ്തു. നിശ്ചിത സമയക്രമം അനുസരിച്ചായിരിക്കും ഈ നിരോധനം നടപ്പിലാക്കുക: സെപ്റ്റംബർ 1 മുതൽ ജൂൺ 14 വരെ രാവിലെ 6:30 മുതൽ 9:00 വരെയും ഉച്ചയ്ക്ക് ശേഷം 12:30 മുതൽ 3:30 വരെയുമുള്ള സമയങ്ങളിൽ നിരോധനം ബാധകമായിരിക്കും. ജൂൺ 15 മുതൽ ആഗസ്റ്റ് 31 വരെ (വേനൽക്കാലം) ഉച്ചയ്ക്ക് ശേഷം 12:30 മുതൽ 3:30 വരെയുള്ള സമയത്ത് മാത്രമായിരിക്കും നിരോധനം. റോഡ് ഉപയോക്താക്കളുടെ സുരക്ഷയും സുഗമമായ ഗതാഗതവും ഉറപ്പാക്കാൻ എല്ലാ ട്രക്ക് ഡ്രൈവർമാരും ഈ സമയക്രമം കൃത്യമായി പാലിക്കണമെന്ന് ട്രാഫിക് വകുപ്പ് അഭ്യർത്ഥിച്ചു.

കുവൈത്ത്: അഗ്രിക്കൾച്ചറൽ കോഓപ്പറേറ്റീവിലെ കടകളില്‍ തീപിടിത്തം റിപ്പോര്‍ട്ട് ചെയ്തു

Wafra Agricultural Cooperative Shops Fire കുവൈത്ത് സിറ്റി: വഫ്ര അഗ്രിക്കൾച്ചറൽ കോഓപ്പറേറ്റീവിലെ കടകളില്‍ തീപിടിത്തം റിപ്പോര്‍ട്ട് ചെയ്തു. ബുധനാഴ്ച വൈകുന്നേരം ഉണ്ടായ തീപിടിത്തത്തില്‍ വഫ്ര അഗ്രിക്കൾച്ചറൽ കോഓപ്പറേറ്റീവിലെ നിരവധി കടകളിൽ നാശനഷ്ടമുണ്ടായി. അഗ്നിശമന സേനാ വിഭാഗമാണ് തീ നിയന്ത്രണവിധേയമാക്കിയത്. സംഭവമറിഞ്ഞ് വഫ്ര, നുവൈസീബ് ഫയർ സ്റ്റേഷനുകളിൽ നിന്നുള്ള അഗ്നിശമന സേനാംഗങ്ങൾ അതിവേഗം സ്ഥലത്തെത്തുകയും തീ മറ്റ് ഭാഗങ്ങളിലേക്ക് പടരുന്നത് തടയാനായി ഉടനടി പ്രതിരോധ പ്രവർത്തനങ്ങൾ ആരംഭിക്കുകയും ചെയ്തു. കൃത്യമായ ഇടപെടലിലൂടെ തീ നിയന്ത്രണവിധേയമാക്കാനും പ്രദേശം സുരക്ഷിതമാക്കാനും ഫയർഫോഴ്സിന് സാധിച്ചു. ഇതുവഴി വലിയൊരു അപകടമാണ് ഒഴിവായത്.തീപിടിത്തത്തിൽ ആർക്കും കാര്യമായ പരിക്കേറ്റതായി റിപ്പോർട്ടില്ല. അപകടത്തിന്റെ കൃത്യമായ കാരണം ഇതുവരെ ഔദ്യോഗികമായി പ്രഖ്യാപിച്ചിട്ടില്ല. സംഭവത്തെക്കുറിച്ച് അന്വേഷിക്കാനും നാശനഷ്ടങ്ങൾ വിലയിരുത്താനും ബന്ധപ്പെട്ട അധികൃതർ നടപടികൾ ആരംഭിച്ചിട്ടുണ്ട്.

കുവൈത്തിലെ ആറ് ജലസംഭരണ വികസന പദ്ധതികൾ; അനുമതി കാത്ത് മന്ത്രാലയം

Water storage development projects kuwait കുവൈത്ത് സിറ്റി: കുവൈത്ത് വൈദ്യുതി, ജലം, പുനരുപയോഗ ഊർജ മന്ത്രാലയം ആകെ 159.7 ദശലക്ഷം കുവൈത്ത് ദിനാർ ചെലവ് വരുന്ന ആറ് ടെൻഡറുകൾക്ക് സ്റ്റേറ്റ് ഓഡിറ്റ് ബ്യൂറോയുടെ അന്തിമ അനുമതിക്കായി കാത്തിരിക്കുന്നു. തിരുത്തൽ നടപടികൾ ആവശ്യമില്ലാത്ത പക്ഷം അന്തിമ അനുമതി ലഭ്യമാക്കുക എന്ന ലക്ഷ്യത്തോടെ, പ്രീ-ഓഡിറ്റ്, ഓഡിറ്റ്, പുനരവലോകന നടപടിക്രമങ്ങൾക്കായി മെയ്, ജൂൺ മാസങ്ങളിലെ വിവിധ തീയതികളിലാണ് മന്ത്രാലയം ഈ കരാറുകൾ ഓഡിറ്റ് ബ്യൂറോയ്ക്ക് സമർപ്പിച്ചത്. ഇതിനോടകം തന്നെ, ആവശ്യമായ നിബന്ധനകളും മാനദണ്ഡങ്ങളും കൃത്യമായി പാലിച്ച കമ്പനികൾക്ക് ഈ കരാറുകൾ നൽകുന്നതിനായി സെൻട്രൽ ഏജൻസി ഫോർ പബ്ലിക് ടെൻഡേഴ്സിന്റെ അനുമതി മന്ത്രാലയം നേടിയിട്ടുണ്ട്. രാജ്യത്തെ ജലസംഭരണ ശേഷി വർദ്ധിപ്പിക്കുന്നതിനും തടസ്സമില്ലാത്ത ജലവിതരണം ഉറപ്പാക്കുന്നതിനുമായി ജല അടിസ്ഥാനസൗകര്യങ്ങൾ വികസിപ്പിക്കുന്നതിനും നവീകരിക്കുന്നതിനുമുള്ളതാണ് ഈ കരാറുകൾ. പ്രത്യേകിച്ച്, ഉയർന്ന താപനില കാരണം ജലഉപയോഗം കുത്തനെ ഉയരുന്ന വേനൽക്കാലത്ത് ഈ പദ്ധതികൾ ഏറെ പ്രയോജനം ചെയ്യും. 42.268 ദശലക്ഷം ദിനാർ ചെലവിലാണ് ഹവല്ലി വാട്ടർ ഡിസ്ട്രിബ്യൂഷൻ കോംപ്ലക്സിന്റെ നിർമ്മാണവും അനുബന്ധ പ്രവൃത്തികളും നടപ്പിലാക്കുന്നത്. ഇത് പൂർത്തിയാകുന്നതോടെ പ്രതിദിന ശുദ്ധജല സംഭരണശേഷി 66 ദശലക്ഷം ഗാലനായും, പമ്പിങ് ശേഷി പ്രതിദിനം 54.5 ദശലക്ഷം ഗാലനായും ഉയരും. കൂടാതെ ഉപ്പുവെള്ളത്തിന്റെ പമ്പിങ് ശേഷി പ്രതിദിനം 23.5 ദശലക്ഷം ഗാലനായും വർദ്ധിക്കും. 114.28 ദശലക്ഷം ദിനാർ ആകെ ചെലവ് പ്രതീക്ഷിക്കുന്നതാണ് ദോഹ സിവട്ടർ റിവേഴ്സ് ഓസ്മോസിസ് ഡിസാലിനേഷൻ പ്ലാന്റ് പദ്ധതി. പ്ലാന്റിന്റെ നിർമ്മാണവും സ്ഥാപിക്കലും പൂർത്തിയാകുന്നതോടെ, പുതിയ നഗര-താമസ മേഖലകളിലെ വർദ്ധിച്ചുവരുന്ന ജലക്ഷാമം പരിഹരിക്കാൻ പ്രതിദിനം 60 ദശലക്ഷം ഇംപീരിയൽ ഗാലൻ ശുദ്ധജലം കൂടി വിതരണ ശൃംഖലയിലേക്ക് ചേർക്കാൻ സാധിക്കും.

കുവൈത്തിലെ വിദേശികളുടെ വിലാസങ്ങളിൽ കൃത്രിമം കാണിച്ച് സിവിൽ ഐഡി നിർമ്മിച്ച സംഭവം; അറസ്റ്റ്

Kuwait Fake Civil ID കുവൈത്ത് സിറ്റി: വ്യാജ സിവിൽ ഐഡികൾ നിയമവിരുദ്ധമായി നൽകുന്നതിനായി വിദേശികളുടെ താമസ വിലാസങ്ങളിൽ കൃത്രിമത്വവും വ്യാജരേഖ ചമയ്ക്കലും നടത്തിയ രണ്ട് പേരെ കുവൈറ്റ് ജനറൽ ഡിപ്പാർട്ട്‌മെന്റ് ഓഫ് ക്രിമിനൽ ഇൻവെസ്റ്റിഗേഷന്റെ ക്രിമിനൽ സെക്യൂരിറ്റി വിഭാഗം അറസ്റ്റ് ചെയ്തു. പബ്ലിക് അതോറിറ്റി ഫോർ സിവിൽ ഇൻഫർമേഷൻ രേഖകളിൽ, വിദേശികൾ യഥാർത്ഥത്തിൽ താമസിക്കുന്ന സ്ഥലങ്ങളുമായി പൊരുത്തപ്പെടാത്ത വിലാസങ്ങൾ ഉൾപ്പെടുത്തി മാറ്റങ്ങൾ വരുത്താൻ പ്രതികൾ ശ്രമിച്ചതായി സുരക്ഷാ വൃത്തങ്ങൾ അറിയിച്ചു. അന്വേഷണത്തിൽ, കുവൈത്ത് സ്വദേശിയായ പ്രധാന പ്രതി തന്റെ പദവി ദുരുപയോഗം ചെയ്ത് ഓരോ ഇടപാടിനും 100 മുതൽ 120 കുവൈത്ത് ദിനാർ വരെ കൈക്കൂലി വാങ്ങി വിദേശികളുടെ താമസ വിവരങ്ങൾ മാറ്റുകയും പുതുക്കുകയും ചെയ്തതായി കണ്ടെത്തി. പ്രതിയെ കാപ്പിറ്റൽ ഗവർണറേറ്റ് പ്രോസിക്യൂഷന് കൈമാറുകയും ഫോർജറി (വ്യാജരേഖ ചമയ്ക്കൽ), കൈക്കൂലി എന്നീ കുറ്റങ്ങൾ ചുമത്തി തുടർ നിയമനടപടികൾക്കായി സെൻട്രൽ ജയിലിലേക്ക് മാറ്റുകയും ചെയ്തു. നിയമവിരുദ്ധമായി വിലാസം മാറ്റാൻ ആഗ്രഹിക്കുന്ന വിദേശികൾക്കും പ്രധാന പ്രതിക്കുമിടയിൽ ഇടനിലക്കാരനായി പ്രവർത്തിച്ച സഹപ്രതിയെയും അധികൃതർ അറസ്റ്റ് ചെയ്തിട്ടുണ്ട്. ചോദ്യം ചെയ്യലിൽ, ഓരോ ഇടപാടിനും 150 ദിനാർ വീതം വാങ്ങിയിരുന്നതായും ഇതിൽ 30 മുതൽ 50 ദിനാർ വരെ കമ്മീഷനായി താൻ എടുത്തിരുന്നതായും ഇയാൾ സമ്മതിച്ചു.

കുവൈത്തില്‍ പൊടിക്കാറ്റ് കുറയുന്നു; വരും മണിക്കൂറുകളിൽ കാലാവസ്ഥ മെച്ചപ്പെടുമോ?

Kuwait Dust Storm കുവൈത്ത് സിറ്റി: വടക്കുപടിഞ്ഞാറൻ കാറ്റിന്റെ വേഗത കുറയുന്നതോടെ കുവൈത്തിൽ നിലവിലുള്ള പൊടിക്കാറ്റ് നിറഞ്ഞ അന്തരീക്ഷം വരും മണിക്കൂറുകളിൽ ക്രമേണ മെച്ചപ്പെടുമെന്ന് കാലാവസ്ഥാ നിരീക്ഷണ കേന്ദ്രം ബുധനാഴ്ച അറിയിച്ചു. ഉപരിതല ന്യൂനമർദവും അതോടൊപ്പമുള്ള ഉഷ്ണതരംഗവും ശക്തമായ വടക്കുപടിഞ്ഞാറൻ കാറ്റും കാരണം ചൊവ്വാഴ്ച രാവിലെ മുതൽ രാജ്യത്ത് അസ്ഥിരമായ കാലാവസ്ഥയാണ് അനുഭവപ്പെടുന്നതെന്ന് കാലാവസ്ഥാ വകുപ്പ് ആക്ടിങ് ഡയറക്ടർ ളറാർ അൽ-അലി കുവൈറ്റ് ന്യൂസ് ഏജൻസിയോട് പറഞ്ഞു.ബുധനാഴ്ച കാറ്റിന്റെ വേഗത വർദ്ധിക്കുകയും ചില സമയങ്ങളിൽ മണിക്കൂറിൽ 60 കിലോമീറ്ററിലധികം വേഗത കൈവരിക്കുകയും ചെയ്തു. ഇത് തുറസ്സായ സ്ഥലങ്ങളിൽ ശക്തമായ മണൽക്കാറ്റിനും പൊടിക്കാറ്റിനും കാരണമായി. ചില പ്രദേശങ്ങളിൽ കാഴ്ചപരിധി ഏകദേശം 1,000 മീറ്ററായി കുറയുകയും ചെയ്തു. എന്നാൽ കാറ്റിന്റെ വേഗത ക്രമേണ കുറയുമെന്നും, രാത്രിയുടെ തുടക്കത്തോടെ അന്തരീക്ഷത്തിലെ പൊടിയുടെ അളവ് കുറഞ്ഞ് കാഴ്ചപരിധി മെച്ചപ്പെടുമെന്നും അൽ-അലി വ്യക്തമാക്കി. വ്യാഴാഴ്ച പകൽ സമയത്ത് കടുത്ത ചൂടും രാത്രിയിൽ നേരിയ ചൂടുമുള്ള കാലാവസ്ഥയായിരിക്കും അനുഭവപ്പെടുകയെന്നാണ് പ്രവചനം. മണിക്കൂറിൽ 10 മുതൽ 30 കിലോമീറ്റർ വരെ വേഗതയുള്ള നേരിയതോ മിതമായതോ ആയ വടക്കുപടിഞ്ഞാറൻ കാറ്റാണ് വ്യാഴാഴ്ച പ്രതീക്ഷിക്കുന്നത്. പൊടിക്കാറ്റ് പൂർണ്ണമായും മാറുന്നതുവരെ വാഹനമോടിക്കുന്നവരും താമസക്കാരും, പ്രത്യേകിച്ച് തുറസ്സായ സ്ഥലങ്ങളിൽ ഉള്ളവർ, ജാഗ്രത പാലിക്കണമെന്ന് അധികൃതർ നിർദ്ദേശിച്ചു.

കുവൈത്തില്‍ ജിസിസി പൗരന്മാർക്ക് സിവിൽ ഐഡി പുതുക്കാം; നടപടികൾ ഇനി ലളിതം

GCC Citizens Renew Civil ID കുവൈത്ത് സിറ്റി: കുവൈത്തിലുള്ള ഗൾഫ് സഹകരണ കൗൺസിൽ പൗരന്മാർക്കായുള്ള സിവിൽ ഐഡി പുതുക്കൽ നടപടിക്രമങ്ങളിൽ ‘സഹേൽ’ ആപ്ലിക്കേഷൻ വഴി സമഗ്രമായ പരിഷ്കാരം കൊണ്ടുവന്നതായി പബ്ലിക് അതോറിറ്റി ഫോർ സിവിൽ ഇൻഫർമേഷൻ അറിയിച്ചു. അപേക്ഷ സമർപ്പിക്കുന്ന സമയത്ത് വ്യക്തി നൽകുന്ന വിവരങ്ങളുടെയും നിലവിലെ സ്റ്റാറ്റസിന്റെയും അടിസ്ഥാനത്തിലായിരിക്കും പുതിയ സംവിധാനം പുതുക്കൽ അഭ്യർത്ഥനകൾ പ്രോസസ്സ് ചെയ്യുക എന്ന് അതോറിറ്റി വ്യക്തമാക്കി. നടപടിക്രമങ്ങൾ ലളിതമാക്കുക, ഡിജിറ്റൽ സേവനങ്ങൾ കൂടുതൽ മെച്ചപ്പെടുത്തുക, കുവൈറ്റിൽ താമസിക്കുന്ന ജിസിസി പൗരന്മാർക്ക് സിവിൽ ഐഡി പുതുക്കൽ സേവനങ്ങൾ കൂടുതൽ കാര്യക്ഷമമായി ലഭ്യമാക്കുക എന്നിവയാണ് ഈ പുതിയ പരിഷ്കരണത്തിലൂടെ ലക്ഷ്യമിടുന്നത്.