Water Distribution കുവൈത്ത് സിറ്റി: കുവൈത്തിലെ വിവിധ ഭാഗങ്ങളിൽ ജലവിതരണം തടസപ്പെട്ടേക്കുമെന്ന് അറിയിപ്പ്. അൽ-അബ്ദാലി റോഡിലെ പ്രധാന ജലശൃംഖലകളിൽ അടിയന്തര അറ്റകുറ്റപ്പണികൾ നടത്തുന്നതിനാൽ മെയ് 24 ഞായറാഴ്ച്ച രാത്രി മുതൽ രാജ്യത്തെ വിവിധ ഭാഗങ്ങളിൽ ജലവിതരണം തടസ്സപ്പെടുമെന്ന് വൈദ്യുതി, ജലം, പുനരുപയോഗ ഊർജ മന്ത്രാലയം അറിയിച്ചു.

ഞായറാഴ്ച രാത്രി 8:00 മണിക്ക് ആരംഭിക്കുന്ന അറ്റകുറ്റപ്പണികൾ 12 മണിക്കൂർ നീണ്ടുനിൽക്കുമെന്നാണ് അധികൃതർ വ്യക്തമാക്കുന്നത്. അൽ-മുത്ല, അൽ-റൗദത്തൈൻ, അൽ-ഖുഷാനിയ, അൽ-അബ്ദാലി അൽ-ബലദ്, ഉമ്മ് നിഖ തുടങ്ങിയ പ്രദേശങ്ങളിൽ താമസിക്കുന്നവരും സ്ഥാപനങ്ങളും ആവശ്യത്തിന് വെള്ളം കരുതിവെക്കണമെന്നും ആവശ്യമായ മുൻകരുതലുകൾ സ്വീകരിക്കണമെന്നും മന്ത്രാലയം പ്രത്യേക നിർദ്ദേശം നൽകി. ജലവിതരണവുമായി ബന്ധപ്പെട്ട് എന്തെങ്കിലും അടിയന്തര തടസ്സങ്ങൾ നേരിടുകയാണെങ്കിൽ 152 എന്ന എമർജൻസി ഹോട്ട്ലൈൻ നമ്പറിൽ ബന്ധപ്പെടാമെന്നും അധികൃതർ കൂട്ടിച്ചേർത്തു.

Kuwait Hajj Mission തീർത്ഥാടകർക്ക് സേവനം ഉറപ്പാക്കൽ; കുവൈത്ത് ഹജ്ജ് മിഷൻ ആസ്ഥാനം തുറന്നു

Kuwait Hajj Mission കുവൈത്ത് സിറ്റി: കുവൈത്ത് ഹജ്ജ് മിഷൻ ആസ്ഥാനം തുറന്നു. കുവൈത്തിൽ നിന്നുള്ള തീർത്ഥാടകരെ സ്വീകരിക്കുന്നതിനും അവർക്ക് മികച്ച സേവനങ്ങൾ നൽകുന്നതിനുമുള്ള ഒരുക്കങ്ങളുടെ ഭാഗമായാണ് നടപടി. കുവൈത്ത് ഹജ്ജ് മിഷന്റെ തലവനും ഇസ്ലാമിക കാര്യ മന്ത്രാലയത്തിന്റെ ആക്ടിംഗ് അണ്ടർസെക്രട്ടറിയുമായ സുലൈമാൻ അൽ-സുവൈലിമാണ് കുവൈത്ത് ഹജ്ജ് മിഷന്റെയും പ്രചാരണ പരിപാടികളുടെയും ഉദ്ഘാടനം നിർവ്വഹിച്ചത്.

മക്കയിലും പുണ്യസ്ഥലങ്ങളിലും തീർഥാടകരെ സേവിക്കാനുള്ള മിഷൻ ടീമുകളുടെ സന്നദ്ധത അൽ-സുവൈലിം സ്ഥിരീകരിച്ചു. തീർഥാടകർക്ക് എളുപ്പത്തിലും ശാന്തമായും ആചാരങ്ങൾ നിർവഹിക്കാൻ സഹായിക്കുന്നതിന് ഒന്നിലധികം കമ്മിറ്റികൾക്കിടയിൽ സംയോജിത ശ്രമങ്ങളുടെ ആവശ്യകത അദ്ദേഹം അടിവരയിട്ടു. ഹജ്ജുമായി ബന്ധപ്പെട്ട എല്ലാ ക്രമീകരണങ്ങളെയും നടത്തിപ്പിനെയും കുറിച്ചും അദ്ദേഹം സംസാരിച്ചു. ഹജ്ജ് തീർത്ഥാടകരുടെ സുരക്ഷ ഉറപ്പാക്കുന്നതിന് സഹായിക്കുന്ന വിധത്തിൽ നിർദ്ദേശങ്ങളും മാർഗ്ഗനിർദ്ദേശങ്ങളും പാലിക്കേണ്ടതിന്റെ ആവശ്യകത അദ്ദേഹം ഉയർത്തിക്കാട്ടി.

Public Property പൊതുസ്വത്ത് അനധികൃതമായി കൈയ്യേറി; കുവൈത്തിൽ കണ്ടെത്തിയത് 120 നിയമലംഘനങ്ങൾ

Public Property കുവൈത്ത് സിറ്റി: വ്യാവസായിക മേഖലയിലെ നിയമലംഘനങ്ങൾ കണ്ടെത്താൻ ശക്തമായ പരിശോധനയുമായി കുവൈത്ത്. വ്യാവസായിക മേഖലയിലെ നിയമലംഘനങ്ങൾ കണ്ടെത്താൻ ലക്ഷ്യമിട്ട് കുവൈത്ത് മുൻസിപ്പാലിറ്റി അൽ ജഹ്‌റാ ഗവർണറേറ്റിൽ പരിശോധനാ ക്യാമ്പെയ്ൻ നടത്തി. പബ്ലിക് റിലേഷൻസ് വകുപ്പ് തയ്യാറാക്കിയ ഷെഡ്യൂൾ അനുസരിച്ച് നടത്തിയ ക്യാമ്പെയ്‌ന്റെ ഫലമായി പൊതുസ്വത്ത് അനധികൃതമായി കൈയ്യേറിതിന് 120 നിയമലംഘനങ്ങൾ കണ്ടെത്തി. ശരിയായ അനുമതിയില്ലാതെ വാണിജ്യ സ്ഥാപനങ്ങൾക്ക് മുന്നിൽ സ്ഥലം ഉപയോഗിച്ചതാണ് നിയമലംഘനങ്ങളിൽ ഉൾപ്പെടുന്നത്. വരും ദിവസങ്ങളിലും ശക്തമായ പരിശോധന തുടരുമന്നും നിയമലംഘകർക്കെതിരെ നടപടിയുണ്ടാകുമെന്നും അധികൃതർ കൂട്ടിച്ചേർത്തു.

Meat Safety മാംസത്തിന്റെ ഗുണനിലവാരം ഉറപ്പാക്കൽ; വിട്ടുവീഴ്ച്ചയില്ലാത്ത പരിശോധനയുമായി കുവൈത്ത്

Meat Safety കുവൈത്ത് സിറ്റി: രാജ്യത്ത് വിതരണം ചെയ്യുന്ന മാംസത്തിന്റെ സുരക്ഷിതത്വവും ഗുണനിലവാരവും ഉറപ്പാക്കുന്നതിനായി കശാപ്പുശാലകളിൽ ശക്തമായ പരിശോധനയുമായി കുവൈത്ത് പബ്ലിക് അതോറിറ്റി ഫോർ ഫുഡ് ആൻഡ് ന്യൂട്രീഷൻ. കശാപ്പുശാലകളിൽ മൃഗങ്ങളെ എത്തിക്കുന്നത് മുതൽ അവ ഉപഭോക്താക്കളുടെ കൈകളിൽ എത്തുന്നതുവരെയുള്ള ഓരോ ഘട്ടത്തിലും കർശനമായ മാനദണ്ഡങ്ങൾ അതോറിറ്റി നിശ്ചയിച്ചിട്ടുണ്ട്.

നിയന്ത്രിതമായ സാഹചര്യങ്ങളിൽ മൃഗങ്ങളുടെ ക്ഷേമം പൂർണ്ണമായും ഉറപ്പാക്കിക്കൊണ്ട് അവയെ സ്വീകരിക്കുകയും പരിശോധിക്കുകയും ചെയ്യുന്നതോടെയാണ് ഈ പ്രക്രിയ ആരംഭിക്കുന്നത്. ഇസ്ലാമിക നിയമപ്രകാരമാണ് അറവ് നടത്തുന്നതെന്ന് അധികൃതർ ഉറപ്പുവരുത്തുന്നു. ഇതിന് ശേഷം, മാംസം പൂർണ്ണമായും ആരോഗ്യകരമാണെന്നും ഉയർന്ന ഗുണനിലവാരം പുലർത്തുന്നുണ്ടെന്നും ഉറപ്പാക്കാൻ വിദഗ്ദ്ധരായ വെറ്ററിനറി ഡോക്ടർമാരുടെ നേതൃത്വത്തിൽ സമഗ്രമായ പരിശോധനകൾ നടത്തും. പരിശോധന വിജയകരമായി പൂർത്തിയാക്കുന്ന മാംസഭാഗങ്ങൾ കൃത്യമായി കഴുകി ഉണക്കിയ ശേഷം, എല്ലാ ആരോഗ്യ-സുരക്ഷാ പരിശോധനകളും പാസ്സായതായി സാക്ഷ്യപ്പെടുത്തുന്ന ഔദ്യോഗിക ഫുഡ് അതോറിറ്റിയുടെ സീൽ പതിക്കും. ശേഷം മാംസത്തിന്റെ പുതുമയും പോഷകമൂല്യവും നഷ്ടപ്പെടാതെ സൂക്ഷിക്കുന്നതിനായി ഇവ പ്രത്യേക ശീതീകരണ സംഭരണികളിലേക്ക് മാറ്റും.

അവിടെ നിന്ന് കടുത്ത താപനില നിയന്ത്രണ സംവിധാനങ്ങളുള്ള റെഫ്രിജറേറ്റഡ് വാഹനങ്ങളിലാണ് വിപണികളിലേക്കും ഉപഭോക്താക്കളിലേക്കും മാംസം എത്തിക്കുന്നത്. പൊതുജനങ്ങൾക്ക് സുരക്ഷിതവും ഏറ്റവും മികച്ചതുമായ മാംസം ലഭ്യമാക്കുക എന്ന ലക്ഷ്യത്തോടെയാണ് നിരീക്ഷണം ശക്തമാക്കിയിരിക്കുന്നതെന്ന് അധികൃതർ അറിയിച്ചു. നിയമലംഘകർക്കെതിരെ വിട്ടുവീഴ്ച്ചയില്ലാത്ത നടപടികൾ സ്വീകരിക്കുമെന്നും അധികൃതർ കൂട്ടിച്ചേർത്തു.

CCTV വ്യവസായ മേഖലകളിൽ സിസിടിവി സംവിധാനങ്ങൾ നിർബന്ധനം; നിർദ്ദേശവുമായി കുവൈത്ത്

CCTV കുവൈത്ത് സിറ്റി: വ്യവസായ മേഖലകളിൽ സിസിടിവി സംവിധാനങ്ങൾ നിർബന്ധമാക്കി കുവൈത്ത്. പബ്ലിക് അതോറിറ്റി ഫോർ ഇൻഡസ്ട്രിയാണ് ഇതുസംബന്ധിച്ച നിർദ്ദേശം പുറത്തിറക്കിയത്. വ്യവസായ പ്ലോട്ടുകൾ, സ്‌ക്രാപ്പ് യാർഡുകൾ, സ്റ്റോറേജ് കേന്ദ്രങ്ങൾ എന്നിവിടങ്ങളിലെ ഉടമകളും ഓപ്പറേറ്റർമാരും സുരക്ഷാ ക്യാമറകൾ സ്ഥാപിക്കണമെന്നാണ് അധികൃതർ നൽകുന്ന നിർദ്ദേശം.

ആഭ്യന്തര മന്ത്രാലയത്തിന്റെ 2015ലെ നിയമപ്രകാരമുള്ള സുരക്ഷ നിരീക്ഷണ ചട്ടങ്ങൾ പാലിക്കണമെന്നാണ് അധികൃതർ വ്യക്തമാക്കുന്നത്. പൊതു സ്വകാര്യ വസ്തുക്കളുടെ സുരക്ഷാ ശക്തിപ്പെടുത്താനും വ്യവസായ മേഖലകളിലെ നിയമ ലംഘനങ്ങൾ കുറയ്ക്കാനും ലക്ഷ്യമിട്ടാണ് നടപടി. അംഗീകൃത സാങ്കേതിക മാനദണ്ഡങ്ങൾ പാലിച്ചുള്ള സംവിധാനങ്ങൾ ഉടൻ സ്ഥാപിക്കണമെന്ന് പബ്ലിക് അതോറിറ്റി ഫോർ ഇൻഡസ്ട്രി ആവശ്യപ്പെട്ടു.

Kuwait Airport കുവൈത്ത് വിമാനത്താവളത്തിലെ ടി വൺ ടെർമിനൽ പുനർനിർമ്മിച്ചു; ജൂൺ 1 മുതൽ വിമാന സർവ്വീസുകൾ പുന:രാരംഭിക്കും

Kuwait Airport കുവൈത്ത് സിറ്റി: കുവൈത്ത് വിമാനത്താവളത്തിലെ ടി വൺ ടെർമിനൽ പുനർനിർമ്മിച്ചു. ജൂൺ 1 മുതൽ ഘട്ടം ഘട്ടമായി വിമാന സർവ്വീസുകൾ പുന:രാരംഭിക്കും. കുവൈത്ത് അന്താരാഷ്ട്ര വിമാനത്താവളത്തിൽ അറബ്, വിദേശ എയർലൈൻ സർവീസുകൾ ജൂൺ 1 മുതൽ ഘട്ടംഘട്ടമായി പുനരാരംഭിക്കുമെന്ന് ജനറൽ അതോറിറ്റി ഓഫ് സിവിൽ ഏവിയേഷൻ ഡയറക്ടർ ഷെയ്ഖ് ഹമൂദ് മുബാറക് അൽ സബാഹ് അറിയിച്ചു. ഓപ്പറേഷണൽ സൗകര്യങ്ങളിലെ അറ്റകുറ്റപ്പണികളും വികസന പ്രവർത്തനങ്ങളും പൂർത്തിയാക്കി വിമാനത്താവളത്തിലെ സംവിധാനങ്ങളുടെയും അടിസ്ഥാന സൗകര്യങ്ങളുടെയും സജ്ജീകരണം ഉയർത്തിയ ശേഷമാണ് സർവീസുകൾ പുനരാരംഭിക്കുന്നതെന്ന് അദ്ദേഹം പറഞ്ഞു.

യാത്രക്കാരുടെ സുരക്ഷയും എയർ ട്രാഫിക്കിന്റെ സുഗമമായ പ്രവർത്തനവും ഉറപ്പാക്കുന്ന രീതിയിലായിരിക്കും സർവീസുകൾ പുനരാരംഭിക്കുക. ടെർമിനൽ 1 (T1) ൽ ആവശ്യമായ എല്ലാ പ്രവർത്തനങ്ങളും പൂർത്തിയാക്കുന്നതിൽ സിവിൽ ഏവിയേഷൻ വകുപ്പ് പ്രതിബദ്ധമാണെന്നും അദ്ദേഹം ചൂണ്ടിക്കാട്ടി.

കുവൈത്ത് പ്രധാനമന്ത്രി ഷെയ്ഖ് അഹമ്മദ് അബ്ദുള്ള അൽ അഹമ്മദ് അൽ സബാഹ് വിമാനത്താവളം സന്ദർശിച്ചിരുന്നു. ഇറാനിയൻ ആക്രമണങ്ങൾക്ക് പിന്നാലെ വിമാനത്താവളത്തിൽ നടത്തിയ നവീകരണ-പുനരുദ്ധാരണ പ്രവർത്തനങ്ങൾ വിലയിരുത്താൻ വേണ്ടിയാണ് അദ്ദേഹം വിമാനത്താവളത്തിൽ എത്തിയത്. കുവൈത്ത് അന്താരാഷ്ട്ര വിമാനത്താവളത്തിലെ പാസഞ്ചർ ടെർമിനൽ-1 വീണ്ടും പ്രവർത്തനസജ്ജമാക്കിയത്, രാജ്യത്തെ ഈ ഏറ്റവും പ്രധാനപ്പെട്ട പൊതുസേവന കേന്ദ്രത്തെ പൂർണ്ണമായ തോതിൽ പ്രവർത്തനത്തിലേക്ക് തിരികെ കൊണ്ടുവരുന്നതിനുള്ള നിർണായക ചുവടുവെപ്പാണെന്ന് അദ്ദേഹം പറഞ്ഞു.

Fire Safety Campaign അഗ്നി സുരക്ഷാ മാനദണ്ഡങ്ങൾ ലംഘിച്ചു; കുവൈത്തിൽ 57 സ്ഥാപനങ്ങൾക്ക് പൂട്ടുവീണു

Fire Safety Campaign കുവൈത്ത് സിറ്റി: അഗ്നി സുരക്ഷാ മാനദണ്ഡങ്ങൾ ലംഘിച്ച 57 സ്ഥാപനങ്ങൾക്ക് കുവൈത്തിൽ പൂട്ടുവീണു. കെട്ടിടങ്ങളിലും വാണിജ്യ സൗകര്യങ്ങളിലും അഗ്നി സുരക്ഷയും പ്രതിരോധ നടപടികളും നടപ്പിലാക്കുന്നതിനുള്ള നിരന്തര ശ്രമങ്ങളുടെ ഭാഗമായി ക്യാപിറ്റൽ സിറ്റിയിലും ഫർവാനിയ, അഹമ്മദി എന്നിവ ഉൾപ്പെടെ നിരവധി ഗവർണറേറ്റുകളിൽ ജനറൽ ഫയർഫോഴ്‌സ് വിപുലമായ പരിശോധനാ ക്യാമ്പെയ്‌നുകൾ നടത്തി.

അഗ്നി സുരക്ഷാ മാനദണ്ഡങ്ങൾ ലംഘിച്ച കെട്ടിടങ്ങൾ കണ്ടെത്തുന്നതിനായാണ് പരിശോധനാ ക്യാമ്പെയ്ൻ നടത്തുന്നത്. ജീവനും സ്വത്തിനും സംരക്ഷണം നൽകുന്നതിനായി എല്ലാ സുരക്ഷാ ചട്ടങ്ങളും കൃത്യമായി പാലിക്കുന്നുണ്ടെന്ന് ഉറപ്പാക്കുകയാണ് പരിശോധനയുടെ ലക്ഷ്യമെന്ന് അധികൃതർ വ്യക്തമാക്കി.

സുരക്ഷാ ചട്ടങ്ങളുടെ ഗുരുതരമായ ലംഘനം കണ്ടെത്തിയതിനെ തുടർന്നാണ് 57 സ്ഥാപനങ്ങൾക്ക് പൂട്ടുവീണത്. 562 സ്ഥാപനങ്ങൾക്ക് നോട്ടീസ് നൽകുകയും ചെയ്തിട്ടുണ്ട്.

Civil ID സിവിൽ ഐഡി ലഭിക്കാൻ ഇനി കൂടുതൽ എളുപ്പമായ മാർഗം; ക്യുആർ കോഡ് സേവനവുമായി കുവൈത്ത്

Civil ID കുവൈത്ത് സിറ്റി: സിവിൽ ഐഡി ലഭിക്കാൻ ഇനി കൂടുതൽ എളുപ്പമായ മാർഗം. ഇതിനായി കുവൈത്തിൽ ക്യുആർ കോഡ് സേവനം ആരംഭിച്ചു. My Identity’ ആപ്പിലൂടെ പുതിയ QR കോഡ് സേവനം ആരംഭിച്ചതായി പബ്ലിക് അതോറിറ്റി ഫോർ സിവിൽ ഇൻഫർമേഷൻ അറിയിച്ചു. ആദ്യമായി സിവിൽ ഐഡി എടുക്കുന്നവർക്കും നഷ്ടപ്പെട്ട കാർഡിന് പകരം പുതിയത് ലഭിക്കുന്നവർക്കും ഈ സേവനം ഉപയോഗിക്കാനാകും.

പുതിയ സംവിധാനം വഴി സിവിൽ ഐഡി കൈപ്പറ്റുന്നതിനുള്ള നടപടിക്രമങ്ങൾ ലളിതമാക്കുകയും സേവനങ്ങൾ വേഗത്തിലാക്കുകയും ചെയ്യുന്നതാണ് ലക്ഷ്യമെന്ന് പാസി വ്യക്തമാക്കി. സിവിൽ ഐഡി തയ്യാറായാൽ ‘My Identity’ ആപ്പിലൂടെ ഉപഭോക്താക്കൾക്ക് നോട്ടിഫിക്കേഷൻ ലഭിക്കും. അതോടൊപ്പം QR കോഡ് ജനറേറ്റ് ചെയ്യാനുള്ള ലിങ്കും ലഭ്യമാകും. ഉപയോക്താക്കൾ ഫോൺ നമ്പർ നൽകുന്നതോടെ ഒടിപി ലഭിക്കും. പരിശോധന പൂർത്തിയാക്കിയതിന് ശേഷം സിവിൽ ഐഡി കൈപ്പറ്റാൻ ആവശ്യമായ QR കോഡ് ലഭ്യമാകുമെന്ന് അധികൃതർ കൂട്ടിച്ചേർത്തു.