India UAE flights ticket ദുബായ്: വേനലവധി കഴിഞ്ഞ് ഇന്ത്യയിൽ നിന്ന് യുഎഇയിലേക്ക് മടങ്ങുന്ന പ്രവാസികൾക്ക് ആശ്വാസവാർത്ത. ഓഗസ്റ്റ് അവസാന വാരത്തെ അപേക്ഷിച്ച് സെപ്റ്റംബർ പകുതിയോടെ വിമാന ടിക്കറ്റ് നിരക്കിൽ 64 ശതമാനം വരെ കുറവ് രേഖപ്പെടുത്തി. സെപ്റ്റംബർ 13-ന് ശേഷമുള്ള യാത്രകൾക്ക് ഒരാൾക്ക് 1,600 ദിർഹം (ഏകദേശം 36,000 രൂപ) വരെ ലാഭിക്കാൻ സാധിക്കുമെന്നാണ് കണക്കുകൾ സൂചിപ്പിക്കുന്നത്. ഇന്ത്യയിലെ പ്രധാന ആറ് നഗരങ്ങളിൽ നിന്നുള്ള നേരിട്ടുള്ള വിമാന നിരക്കുകൾ പരിശോധിക്കുമ്പോൾ ഓഗസ്റ്റ് 30-നെ അപേക്ഷിച്ച് സെപ്റ്റംബർ 13-ന് 49 മുതൽ 64 ശതമാനം വരെ കുറവുണ്ട്. ശരാശരി 2,089 ദിർഹം ഉണ്ടായിരുന്ന ടിക്കറ്റ് നിരക്ക് 894 ദിർഹത്തിലേക്ക് താഴ്ന്നു. ഏറ്റവും വലിയ ഇടിവ് രേഖപ്പെടുത്തിയത് ബെംഗളൂരുവിലാണ്. ഓഗസ്റ്റ് 30-ന് 2,513 ദിർഹം ഉണ്ടായിരുന്ന നിരക്ക് സെപ്റ്റംബർ 13-ന് 914 ദിർഹമായി കുറഞ്ഞു. ലാഭം ഏകദേശം 1,600 ദിർഹം. കേരളത്തിൽ നിന്നുള്ള യാത്രക്കാർക്കും വലിയ ലാഭമുണ്ട്. കൊച്ചിയിൽ നിന്ന് ഓഗസ്റ്റ് 30-ന് 2,272 ദിർഹം ഉണ്ടായിരുന്ന നിരക്ക് സെപ്റ്റംബർ 13-ന് 1,057 ദിർഹമായി കുറഞ്ഞു (53% കുറവ്). കോഴിക്കോട് നിന്നുള്ള നിരക്ക് 2,285 ദിർഹത്തിൽ നിന്ന് 1,070 ദിർഹമായും കുറഞ്ഞു. 1,200 ദിർഹത്തിലധികം ഇവിടെ ലാഭിക്കാം. ഡല്ഹിയില് 2,227 ദിർഹത്തിൽ നിന്ന് നിരക്ക് 825 ദിർഹമായി കുറഞ്ഞു. ഹൈദരാബാദിൽ നിന്ന് 1,777 ദിർഹം ഉണ്ടായിരുന്നത് 758 ദിർഹമായും മുംബൈയിൽ നിന്ന് 1,460 ദിർഹം ഉണ്ടായിരുന്നത് 739 ദിർഹമായും കുറഞ്ഞു. സ്കൂളുകൾ തുറക്കുന്നതിന് മുന്നോടിയായി കുടുംബങ്ങൾ കൂട്ടത്തോടെ മടങ്ങുന്ന തിരക്ക് (Summer Rush) ഓഗസ്റ്റ് അവസാനത്തോടെ അവസാനിക്കുന്നതാണ് നിരക്ക് താഴാൻ കാരണം. എന്നാൽ ഈ കുറഞ്ഞ നിരക്ക് അധികകാലം നീണ്ടുനിൽക്കില്ലെന്ന് ട്രാവൽ ഏജന്റുമാർ മുന്നറിയിപ്പ് നൽകുന്നു. ദുബായിലെ വിവിധ മേളകളും പരിപാടികളും ആരംഭിക്കുന്നതോടെയും ശൈത്യകാല ടൂറിസം സീസൺ തുടങ്ങുന്നതോടെയും ഒക്ടോബറോടെ നിരക്ക് വീണ്ടും വർധിക്കാൻ സാധ്യതയുണ്ട്. തിരക്ക് ഒഴിവാക്കി സെപ്റ്റംബർ പകുതിയോടെ യാത്ര പ്ലാൻ ചെയ്യുന്നവർക്ക് വലിയൊരു തുക തന്നെ ലാഭിക്കാൻ ഈ അവസരം സഹായിക്കും.
