food inspection campaign kuwait കുവൈത്ത് സിറ്റി: ജനങ്ങളുടെ ആരോഗ്യ സുരക്ഷ ഉറപ്പാക്കുന്നതിന്റെ ഭാഗമായി കുവൈത്തിലെ ഭക്ഷ്യശാലകളിൽ പരിശോധന ശക്തമാക്കി പബ്ലിക് അതോറിറ്റി ഫോർ ഫുഡ് ആൻഡ് ന്യൂട്രീഷൻ. ഫർവാനിയ ഗവർണറേറ്റ് ഇൻസ്പെക്ഷൻ വിഭാഗത്തിന്റെ നേതൃത്വത്തിൽ അർദിയ ഇൻഡസ്ട്രിയൽ ഏരിയയിലെ വിവിധ ഭക്ഷ്യ സ്ഥാപനങ്ങളിലാണ് പരിശോധന നടത്തിയത്. പരിശോധനയിൽ ഗൗരവകരമായ ഏഴ് നിയമലംഘനങ്ങൾ കണ്ടെത്തി. ആരോഗ്യ-ശുചിത്വ മാനദണ്ഡങ്ങൾ പാലിക്കാതിരിക്കുക, കാലാവധി കഴിഞ്ഞ ആരോഗ്യ ലൈസൻസുകൾ ഉപയോഗിക്കുക, ഭക്ഷ്യ ഉൽപ്പന്നങ്ങളുടെ വിതരണത്തിലും വ്യാപാരത്തിലും ചട്ടങ്ങൾ ലംഘിക്കുക, ആരോഗ്യ സർട്ടിഫിക്കറ്റുകൾ ഇല്ലാത്ത തൊഴിലാളികളെ ജോലിക്കുവെക്കുക എന്നിവയാണ് കണ്ടെത്തിയ പ്രധാന ലംഘനങ്ങൾ. നിയമലംഘനം നടത്തിയ സ്ഥാപനങ്ങൾക്കെതിരെ നിലവിലുള്ള നിയമപ്രകാരമുള്ള കർശന നടപടികൾ സ്വീകരിച്ചതായി അധികൃതർ വ്യക്തമാക്കി. ഭക്ഷ്യസുരക്ഷ ഉറപ്പാക്കാനും ഉപഭോക്താക്കളുടെ ആരോഗ്യം സംരക്ഷിക്കാനുമായി വരും ദിവസങ്ങളിലും രാജ്യവ്യാപകമായി പരിശോധനകൾ തുടരുമെന്ന് പബ്ലിക് അതോറിറ്റി ഫോർ ഫുഡ് ആൻഡ് ന്യൂട്രീഷൻ അറിയിച്ചു. എല്ലാ ഭക്ഷ്യ സ്ഥാപനങ്ങളും ആരോഗ്യ മന്ത്രാലയത്തിന്റെയും അതോറിറ്റിയുടെയും നിർദ്ദേശങ്ങൾ കർശനമായി പാലിക്കണമെന്നും അധികൃതർ മുന്നറിയിപ്പ് നൽകി.

കുവൈത്തിലെ പുതിയ ജോലി അവസരങ്ങൾ പുതിയ അറിയുവാൻ ഇവിടെ ക്ലിക്ക് ചെയ്യുക

ട്രാഫിക് പിഴ കുടിശ്ശികയുള്ളവർക്ക് ഇനി കാർ വാടകയ്ക്ക് ലഭിക്കില്ല; കുവൈത്തിൽ കർശന നടപടി

Kuwait car rental block contracts കുവൈത്ത് സിറ്റി: കുവൈത്തിൽ ട്രാഫിക് പിഴകൾ അടച്ചുതീർക്കാത്തവർക്ക് ഇനി മുതൽ കാറുകൾ വാടകയ്ക്ക് നൽകില്ല. ജനറൽ ട്രാഫിക് ഡിപ്പാർട്ട്‌മെന്റിന്റെ നിയമലംഘന റെക്കോർഡുകളും കാർ റെന്റൽ കമ്പനികളുടെ സിസ്റ്റവും തമ്മിൽ ഇലക്ട്രോണിക് രീതിയിൽ ബന്ധിപ്പിച്ചതോടെയാണ് ഈ നടപടി പ്രാബല്യത്തിൽ വന്നത്. ഇതോടെ പിഴ കുടിശ്ശികയുള്ളവരുടെ റെന്റൽ കരാറുകൾ പൂർത്തിയാക്കാൻ കമ്പനികൾ വിസമ്മതിച്ചു തുടങ്ങി. പുതിയ സംവിധാനം വഴി കാർ വാടകയ്ക്ക് എടുക്കാൻ വരുന്ന ഉപഭോക്താവിന്റെ ട്രാഫിക് റെക്കോർഡുകൾ പരിശോധിക്കാൻ റെന്റൽ ഓഫീസുകൾക്ക് സാധിക്കും. പിഴകൾ അടയ്ക്കാനുണ്ടെന്ന് കണ്ടാൽ വാടക കരാർ ഒപ്പിടാനോ വാഹനം വിട്ടുനൽകാനോ അനുവാദമുണ്ടാകില്ല. വ്യക്തിയുടെ റെക്കോർഡിലുള്ള ‘ബ്ലോക്ക്’ നീക്കം ചെയ്യുന്നത് വരെ ഈ നിയന്ത്രണം തുടരും. പിഴകൾ പൂർണ്ണമായും അടച്ചുതീർത്ത് ബ്ലോക്ക് നീക്കം ചെയ്താൽ മാത്രമേ ഉപഭോക്താവിന് തുടർനടപടികളുമായി മുന്നോട്ട് പോകാനും വാഹനം കൈപ്പറ്റാനും സാധിക്കൂ. ട്രാഫിക് പിഴകൾ കുന്നുകൂടുന്നത് ഒഴിവാക്കാനും, അവ കൃത്യമായി പിരിച്ചെടുക്കാനുമുള്ള ആഭ്യന്തര മന്ത്രാലയത്തിന്റെ ശ്രമങ്ങളുടെ ഭാഗമായാണ് ഈ പുതിയ തീരുമാനം. സർക്കാർ സംവിധാനങ്ങളും വാഹന സംബന്ധമായ സേവനങ്ങൾ നൽകുന്ന സ്വകാര്യ മേഖലയും തമ്മിലുള്ള ഏകോപനം ശക്തമാക്കുന്നതിലെ സുപ്രധാന ചുവടുവെപ്പാണ് ഈ ഇലക്ട്രോണിക് സംയോജനം. ആഭ്യന്തര മന്ത്രാലയം നടപ്പിലാക്കുന്ന ഡിജിറ്റൽ പരിവർത്തനത്തിന്റെ ഭാഗമായി, പിഴകൾ വേഗത്തിൽ പരിശോധിക്കാനും പണമടയ്ക്കൽ നടപടികൾ ലളിതമാക്കാനും ഇത് സഹായിക്കുമെന്ന് അധികൃതർ വ്യക്തമാക്കി.