security checks at Dubai Airport ദുബായ്: ലോകത്തെ ഏറ്റവും തിരക്കേറിയ വിമാനത്താവളങ്ങളിലൊന്നായ ദുബായ് രാജ്യാന്തര വിമാനത്താവളത്തിൽ സുരക്ഷാ പരിശോധനകൾ ഇനി കൂടുതൽ ലളിതവും വേഗത്തിലുമാകും. അത്യാധുനിക സ്കാനറുകൾ സ്ഥാപിക്കുന്നതോടെ, യാത്രക്കാർക്ക് അവരുടെ ഹാൻഡ്ബാഗുകളിൽ നിന്ന് ലാപ്ടോപ്പുകൾ, മൊബൈൽ ഫോണുകൾ, ദ്രാവകങ്ങൾ തുടങ്ങിയവ പുറത്തെടുക്കാതെ തന്നെ പരിശോധന പൂർത്തിയാക്കാൻ സാധിക്കും. നിലവിലുള്ള സ്കാനിംഗ് യന്ത്രങ്ങൾക്ക് പകരം പുതിയ തലമുറയിൽപ്പെട്ട സിടി സ്കാനറുകളാണ് വിമാനത്താവളത്തിൽ സ്ഥാപിക്കുന്നത്. ബാഗുകൾ തുറക്കാതെ തന്നെ അതിനുള്ളിലെ വസ്തുക്കളുടെ വ്യക്തമായ 3D ദൃശ്യങ്ങൾ നൽകാൻ ഈ യന്ത്രങ്ങൾക്ക് കഴിയും. ഇതോടെ മുൻപ് ഓരോ വസ്തുക്കളും പ്രത്യേകം ട്രേകളിൽ വെച്ച് പരിശോധിച്ചിരുന്ന രീതിക്ക് അവസാനമാകും. ഓരോ യാത്രക്കാരനും സുരക്ഷാ പരിശോധനയ്ക്കായി ചിലവഴിക്കുന്ന സമയം പകുതിയിലധികമായി കുറയും. ബാഗുകൾ തുറക്കുന്നതും സാധനങ്ങൾ വീണ്ടും അടുക്കി വെക്കുന്നതും ഒഴിവാക്കാം. തിരക്കേറിയ സമയങ്ങളിൽ പോലും തടസ്സമില്ലാത്ത പരിശോധന ഉറപ്പാക്കാം. വിമാനത്താവളത്തിലെ പഴയ യന്ത്രങ്ങൾ മാറ്റി പുതിയവ സ്ഥാപിക്കുന്ന നടപടികൾ ഇതിനോടകം ആരംഭിച്ചതായി ദുബായ് എയർപോർട്സ് സിഇഒ പോൾ ഗ്രിഫിത്സ് വ്യക്തമാക്കി. ടെർമിനൽ ഒന്നിൽ പുതിയ ഫ്ലോറിങ് നടത്തുന്നതിനൊപ്പം കൂടുതൽ സുരക്ഷാ ലൈനുകളും സജ്ജീകരിക്കുന്നുണ്ട്. ബെൽറ്റും ഷൂസും അഴിച്ചുവെച്ചുള്ള പഴയകാല പരിശോധനാ രീതികൾ വൈകാതെ പൂർണ്ണമായി അവസാനിപ്പിക്കാനാണ് വിമാനത്താവള അധികൃതർ ലക്ഷ്യമിടുന്നത്. കഴിഞ്ഞ 10 വർഷത്തിനിടെ യാത്രക്കാരുടെ എണ്ണത്തിൽ 20 ശതമാനം വർധനവുണ്ടായ പശ്ചാത്തലത്തിലാണ് വിമാനത്താവളം വിപുലമായ സാങ്കേതിക നവീകരണത്തിന് ഊന്നൽ നൽകുന്നത്.

യുഎഇയിലെ പുതിയ ജോലി അവസരങ്ങൾ അറിയുവാൻ ഇവിടെ ക്ലിക്ക് ചെയ്യുക

3000ലേറെ കുഞ്ഞുങ്ങൾക്ക് ‘കർമ്മം കൊണ്ട് അമ്മ’; ദുബായിലെ വന്ധ്യതാ ചികിത്സാ രംഗത്തിന്‍റെ അമരക്കാരി അന്തരിച്ചു

Dr Mary John Passed Away ദുബായ്: ദുബായിലെ വന്ധ്യതാ ചികിത്സാ രംഗത്ത് വിപ്ലവകരമായ മാറ്റങ്ങൾ കൊണ്ടുവരികയും ആയിരക്കണക്കിന് ദമ്പതികൾക്ക് മാതാപിതാക്കളാകാൻ വഴിയൊരുക്കുകയും ചെയ്ത പ്രമുഖ ഗൈനക്കോളജിസ്റ്റ് ഡോ. മേരി ജോൺ അന്തരിച്ചു. പ്രസവിക്കാതെ തന്നെ മൂവായിരത്തിലധികം കുഞ്ഞുങ്ങൾക്ക് കർമ്മം കൊണ്ട് അമ്മയായ ഇവർ, ഇമറാത്തി കുടുംബങ്ങൾക്കും പ്രവാസി സമൂഹത്തിനും ഒരുപോലെ പ്രിയങ്കരിയായിരുന്നു. വിരമിച്ച ശേഷം അമേരിക്കയിൽ മക്കൾക്കൊപ്പം താമസിച്ചു വരികയായിരുന്നു അദ്ദേഹം. 1987-ൽ ദുബായ് ഹോസ്പിറ്റലിലൂടെയാണ് ഡോ. മേരി തന്റെ ഔദ്യോഗിക ജീവിതം ആരംഭിക്കുന്നത്. പിന്നീട് 1992-ൽ ലത്തീഫ ആശുപത്രിയിലേക്ക് മാറി. അവിടെ 1996 മുതൽ 2006 വരെ ഗൈനക്കോളജി വിഭാഗം മേധാവിയായി സേവനമനുഷ്ഠിച്ചു. 2013-ൽ ദുബായ് ഗൈനക്കോളജി ആൻഡ് ഫെർട്ടിലിറ്റി സെന്ററിന്റെ ചുമതലയേറ്റെടുത്തതോടെയാണ് ദുബായിലെ വന്ധ്യതാ ചികിത്സാ രംഗം ലോകനിലവാരത്തിലേക്ക് ഉയർന്നത്. 2016-ൽ വിരമിക്കുന്നത് വരെ ഈ രംഗത്തെ അവസാനവാക്കായിരുന്നു ഡോ. മേരി. ദുബായ് ഹെൽത്ത് അതോറിറ്റിക്കു കീഴിൽ ജോലി ചെയ്യുന്ന നൂറുകണക്കിന് ഡോക്ടർമാരുടെ പ്രിയപ്പെട്ട അധ്യാപികയായിരുന്നു അവർ. യുഎഇയിലെ ഇന്നത്തെ പ്രമുഖ ഗൈനക്കോളജിസ്റ്റുകളിൽ ഭൂരിഭാഗവും ഡോ. മേരിയുടെ ശിഷ്യരാണ്. രാജ്യത്തെ ഗൈനക്കോളജി ചികിത്സയ്ക്ക് അന്താരാഷ്ട്ര മുഖച്ഛായ നൽകിയതിന് ദുബായ് ഹെൽത്ത് അതോറിറ്റി അവരെ പ്രത്യേകം ആദരിച്ചിട്ടുണ്ട്. അടുത്ത സുഹൃത്തുക്കൾക്ക് ‘ഗേളി’ ആയിരുന്ന ഡോക്ടർ, ഇമറാത്തി കുടുംബങ്ങൾക്ക് സ്വന്തം അമ്മയെപ്പോലെയായിരുന്നു. വന്ധ്യത കാരണം വിഷമിച്ച ആയിരക്കണക്കിന് ഇമറാത്തി കുടുംബങ്ങളിലേക്ക് ചികിത്സയിലൂടെ പ്രതീക്ഷയുടെ വെളിച്ചം എത്തിക്കാൻ അവർക്ക് സാധിച്ചു. ഡോക്ടറുടെ മരണവാർത്ത അറിഞ്ഞതോടെ നൂറുകണക്കിന് സ്വദേശികളാണ് തങ്ങളുടെ വിഷമം മക്കളുമായി പങ്കുവെച്ചത്. ദുബായിലെ വന്ധ്യതാ ചികിത്സയെ ആധുനികവൽക്കരിക്കാനും നൂതന ഉപകരണങ്ങൾ എത്തിക്കാനും ഡോ. മേരി എടുത്ത മുൻകൈ വളരെ വലുതാണെന്ന് ലൈഫ് ലൈൻ ഹോസ്പിറ്റൽസ് ആൻഡ് ക്ലിനിക്സ് ഡയറക്ടർ ഡോ. മാത്യു പാപ്പച്ചൻ അനുസ്മരിച്ചു. ദുബായ് മാർത്തോമ്മാ ഇടവകാംഗമായിരുന്നു. ദുബായിലെ ആരോഗ്യരംഗത്തിന് വലിയൊരു ശൂന്യത അവശേഷിപ്പിച്ചാണ് ആ ആധുനിക വൈദ്യശാസ്ത്ര പ്രതിഭ വിടവാങ്ങിയത്.