Dr Mary John Passed Away ദുബായ്: ദുബായിലെ വന്ധ്യതാ ചികിത്സാ രംഗത്ത് വിപ്ലവകരമായ മാറ്റങ്ങൾ കൊണ്ടുവരികയും ആയിരക്കണക്കിന് ദമ്പതികൾക്ക് മാതാപിതാക്കളാകാൻ വഴിയൊരുക്കുകയും ചെയ്ത പ്രമുഖ ഗൈനക്കോളജിസ്റ്റ് ഡോ. മേരി ജോൺ അന്തരിച്ചു. പ്രസവിക്കാതെ തന്നെ മൂവായിരത്തിലധികം കുഞ്ഞുങ്ങൾക്ക് കർമ്മം കൊണ്ട് അമ്മയായ ഇവർ, ഇമറാത്തി കുടുംബങ്ങൾക്കും പ്രവാസി സമൂഹത്തിനും ഒരുപോലെ പ്രിയങ്കരിയായിരുന്നു. വിരമിച്ച ശേഷം അമേരിക്കയിൽ മക്കൾക്കൊപ്പം താമസിച്ചു വരികയായിരുന്നു അദ്ദേഹം. 1987-ൽ ദുബായ് ഹോസ്പിറ്റലിലൂടെയാണ് ഡോ. മേരി തന്റെ ഔദ്യോഗിക ജീവിതം ആരംഭിക്കുന്നത്. പിന്നീട് 1992-ൽ ലത്തീഫ ആശുപത്രിയിലേക്ക് മാറി. അവിടെ 1996 മുതൽ 2006 വരെ ഗൈനക്കോളജി വിഭാഗം മേധാവിയായി സേവനമനുഷ്ഠിച്ചു. 2013-ൽ ദുബായ് ഗൈനക്കോളജി ആൻഡ് ഫെർട്ടിലിറ്റി സെന്ററിന്റെ ചുമതലയേറ്റെടുത്തതോടെയാണ് ദുബായിലെ വന്ധ്യതാ ചികിത്സാ രംഗം ലോകനിലവാരത്തിലേക്ക് ഉയർന്നത്. 2016-ൽ വിരമിക്കുന്നത് വരെ ഈ രംഗത്തെ അവസാനവാക്കായിരുന്നു ഡോ. മേരി. ദുബായ് ഹെൽത്ത് അതോറിറ്റിക്കു കീഴിൽ ജോലി ചെയ്യുന്ന നൂറുകണക്കിന് ഡോക്ടർമാരുടെ പ്രിയപ്പെട്ട അധ്യാപികയായിരുന്നു അവർ. യുഎഇയിലെ ഇന്നത്തെ പ്രമുഖ ഗൈനക്കോളജിസ്റ്റുകളിൽ ഭൂരിഭാഗവും ഡോ. മേരിയുടെ ശിഷ്യരാണ്. രാജ്യത്തെ ഗൈനക്കോളജി ചികിത്സയ്ക്ക് അന്താരാഷ്ട്ര മുഖച്ഛായ നൽകിയതിന് ദുബായ് ഹെൽത്ത് അതോറിറ്റി അവരെ പ്രത്യേകം ആദരിച്ചിട്ടുണ്ട്. അടുത്ത സുഹൃത്തുക്കൾക്ക് ‘ഗേളി’ ആയിരുന്ന ഡോക്ടർ, ഇമറാത്തി കുടുംബങ്ങൾക്ക് സ്വന്തം അമ്മയെപ്പോലെയായിരുന്നു. വന്ധ്യത കാരണം വിഷമിച്ച ആയിരക്കണക്കിന് ഇമറാത്തി കുടുംബങ്ങളിലേക്ക് ചികിത്സയിലൂടെ പ്രതീക്ഷയുടെ വെളിച്ചം എത്തിക്കാൻ അവർക്ക് സാധിച്ചു. ഡോക്ടറുടെ മരണവാർത്ത അറിഞ്ഞതോടെ നൂറുകണക്കിന് സ്വദേശികളാണ് തങ്ങളുടെ വിഷമം മക്കളുമായി പങ്കുവെച്ചത്. ദുബായിലെ വന്ധ്യതാ ചികിത്സയെ ആധുനികവൽക്കരിക്കാനും നൂതന ഉപകരണങ്ങൾ എത്തിക്കാനും ഡോ. മേരി എടുത്ത മുൻകൈ വളരെ വലുതാണെന്ന് ലൈഫ് ലൈൻ ഹോസ്പിറ്റൽസ് ആൻഡ് ക്ലിനിക്സ് ഡയറക്ടർ ഡോ. മാത്യു പാപ്പച്ചൻ അനുസ്മരിച്ചു. ദുബായ് മാർത്തോമ്മാ ഇടവകാംഗമായിരുന്നു. ദുബായിലെ ആരോഗ്യരംഗത്തിന് വലിയൊരു ശൂന്യത അവശേഷിപ്പിച്ചാണ് ആ ആധുനിക വൈദ്യശാസ്ത്ര പ്രതിഭ വിടവാങ്ങിയത്.

യുഎഇയിലെ പുതിയ ജോലി അവസരങ്ങൾ അറിയുവാൻ ഇവിടെ ക്ലിക്ക് ചെയ്യുക

യുഎഇയിൽ ഇനി ഇലോൺ മസ്കിന്റെ ‘സ്റ്റാർലിങ്ക്’ വിപ്ലവം; അതിവേഗ ഇന്റർനെറ്റ് വിരൽത്തുമ്പിൽ!

UAE Starlink satellite internet അബുദാബി: ഇലോൺ മസ്കിന്റെ ഉപഗ്രഹ ഇന്റർനെറ്റ് സേവനമായ സ്റ്റാർലിങ്ക് ഉടൻ യുഎഇയിൽ ലഭ്യമാകും. രാജ്യത്ത് പ്രവർത്തിക്കുന്നതിനായി പത്ത് വർഷത്തെ ലൈസൻസാണ് സ്റ്റാർലിങ്കിന് ലഭിച്ചത്. യുഎഇ ടെലികമ്മ്യൂണിക്കേഷൻസ് ആൻഡ് ഡിജിറ്റൽ ഗവൺമെന്റ് റെഗുലേറ്ററി അതോറിറ്റി വെള്ളിയാഴ്ചയാണ് ഇതുസംബന്ധിച്ച ‘ജനറൽ സാറ്റലൈറ്റ് സർവീസസ് ലൈസൻസ്’ കമ്പനിക്ക് അനുവദിച്ചത്. നിലവിലുള്ള ഫൈബർ-ഓപ്റ്റിക് കണക്ഷനുകൾക്ക് പുറമെ ഉപഗ്രഹ സേവനം കൂടി വരുന്നതോടെ യുഎഇയുടെ ഡിജിറ്റൽ ഇൻഫ്രാസ്ട്രക്ചർ കൂടുതൽ കരുത്താർജ്ജിക്കും. വ്യക്തികൾക്കും ബിസിനസ് സ്ഥാപനങ്ങൾക്കും സർക്കാർ ഏജൻസികൾക്കും പുറമെ കപ്പലുകൾക്കും വിമാനങ്ങൾക്കും അതിവേഗ ഇന്റർനെറ്റ് ഈ സേവനം വഴി ലഭ്യമാകും. നേരത്തെ 2024-ൽ കപ്പലുകൾക്ക് മാത്രമായി സ്റ്റാർലിങ്കിന് അനുമതി നൽകിയിരുന്നു.

യുഎഇ നിവാസികൾക്ക് ഇപ്പോൾ വെബ്‌സൈറ്റ് വഴി സ്റ്റാർലിങ്ക് പ്രീ-ഓർഡർ ചെയ്യാവുന്നതാണ്. പ്രധാന വിവരങ്ങൾ താഴെ:

മാസവാടക: 300 ദിർഹം (പരിധിയില്ലാത്ത ഡാറ്റ).
ഹാർഡ്‌വെയർ വില: 1,465 ദിർഹം (റൂട്ടർ ഉൾപ്പെടെ).
വേഗത: 400 എംബിപിഎസ് (Mbps) വരെ.
ട്രയൽ: 30 ദിവസത്തെ ട്രയൽ പിരീഡ് ലഭിക്കും.
ഡിപ്പോസിറ്റ്: ബുക്ക് ചെയ്യുമ്പോൾ 300 ദിർഹം ഡിപ്പോസിറ്റ് നൽകണം. ഇത് പിന്നീട് ഹാർഡ്‌വെയർ കിറ്റിന്റെ വിലയിൽ നിന്ന് കുറയ്ക്കും.

ബുക്ക് ചെയ്യുന്നത് എങ്ങനെ?
സ്റ്റാർലിങ്ക് യുഎഇ ഔദ്യോഗിക വെബ്‌സൈറ്റ് സന്ദർശിച്ച് ‘Get started’ ക്ലിക്ക് ചെയ്യുക.
നിങ്ങളുടെ ലൊക്കേഷൻ നൽകി സേവനം ലഭ്യമാണോ എന്ന് പരിശോധിക്കുക.
‘Checkout’ പേജിൽ വ്യക്തിഗത വിവരങ്ങളും ഷിപ്പിംഗ് അഡ്രസ്സും പെയ്‌മെന്റ് വിവരങ്ങളും നൽകുക.
നിലവിൽ ഏകദേശം 286 ദിർഹം ഡിപ്പോസിറ്റ് നൽകി ബുക്കിംഗ് പൂർത്തിയാക്കാം.
ലോകത്തെവിടെയും തടസ്സമില്ലാത്ത ഇന്റർനെറ്റ് എത്തിക്കുക എന്ന ലക്ഷ്യത്തോടെ പ്രവർത്തിക്കുന്ന സ്റ്റാർലിങ്ക് യുഎഇയിൽ എത്തുന്നതോടെ പ്രവാസികൾക്കും ബിസിനസ് മേഖലയ്ക്കും വലിയ സൗകര്യമാകും ലഭിക്കുക.